Barcelona dhe Atletico Madridi e zhvillojnë në fundjavë kryendeshjen e javës në La Liga.

Stadiumi “Camp Nou” është arenë e kësaj sfide që luhet të dielën me fillim nga ora 16:15.

Duke folur në prag të ndeshjes, trajneri i Barcelonës, Xavi Hernanez e ka vlerësuar shumë Atletico Madridin duke thënë se ata janë të rrezikshëm.

“Ata janë ngritur në një mënyrë spektakolare dhe janë shumë të rrezikshëm. Simeone transmeton shumë nga pankina. Ata janë një familje” – tha Xavi në konferencë për media, njofton Football-Espana, transmeton lajmi.net.

“Atletico mund të bëjë gjithçka. Ata luajnë mirë, kanë një bllok të mesëm të mirë dhe janë të shpejtë në tranzicion me lojtarë që janë shumë të mirë në mbrojtje”, tha ndër tjerash Xavi.

Barcelona mundi Atletico Madridin në ndeshjen e kaluar në janar dhe ata do të shpresojnë ta bëjnë këtë përsëri të dielën, pasi synojnë të mbyllin titullin e La Ligës në javët e ardhshme.

Barcelona ka 73 pikë në pozitën e parë, 11 më shumë se Real Madridi në vendin e dytë.

Atletico Madrid ka 60 pikë dhe zë vendin e tretë në renditjen tabelore të La Ligas./Lajmi.net/