Xhudisti Dardan Cena fitoi medaljen e bronztë në Kampionatin Evropian të juniorëve.

Ne Pragë të Çekisë po mbahet Kampionati Evropian i juniorëve, ku xhudisti nga Kosova arriti të dekorohet me një medalje.

Dardan Cena fitoi medaljen e bronztë, në kategorinë -73 kilogramë, transmeton lajmi.net.

Në rrugëtimin e tij deri te lufta për të bronztën, Dardani në raundin e parë e mposhti me Wazaari dhe Ippon xhudistin nga Estonia, Artemi Larionov.

Ndërkaq, në raundin e dytë Cena shënoi fitore me Ippon kundër ukrainasit, Anton Shuhalieiev.

Dardani vazhdoi me fitore ku në raundin e tretë e mposhti me Wazaari xhudistin e Sllovenisë, Nace Herkovic, kurse u njoftua me humbje në çerekfinale, pasi u mposht nga hungarezi, Daniel Szegedi.

Pas kësaj ndeshjeje, Cena vazhdoi në fazën e repesazhit, ku në raundin e parë me Ippon e mposhti çekun, Petr Mlady.

Për të fituar medaljen e bronztë Dardani mposhti hungarezin, Gergely Adorjani./Lajmi.net/