Thaçi thotë se Kurti ka keqpërdorur policinë dhe ka dërguar qytetarët e Shqipërisë në karantinë
Presidenti i Kosovës, Hashim Thaçi ka shkruar se kryeministri në detyrë, Albin Kurti ka keqpërdorur policinë e Kosovës, duke e urdhëruar atë që t’i dërgojë në karantinë qytetarët e Shqipërisë që hyjnë në territorin e Kosovës.
Lajme
Përmes një postimi në “Facebook”, Thaçi ka thënë se Kurti po i heq taksën Serbisë dhe po ia vë atë Shqipërisë.
Sipas presidenti të vendit, Kurti me veprime shtesë ka urdhëruar që automjetet transportuese që hyjnë nga territori i Shqipërisë, në emër të dezinfektimit të ngarkohen me taksë të veçantë, duke rënduar edhe më shumë lëvizjen e lirë dhe qarkullimin e mallrave.
Postimi i plotë:
Albin Kurti derisa ka hapur krahë më krah kufirin me Serbinë, për të hyrë kushdo, pa asnjë procedurë si në bahçe të babës, ai nga zyra e uzurpuar sot ka urdhëruar dhe keqpërdorur Policinë e Kosovës. Ai padrejtësisht dhe kundërligjshëm sot ka urdhëruar policinë që të gjithë qytetarët e Shqipërisë që hyjnë në territorin e Kosovës, përpos vonesave procedurale, të dërgohen shtatë ditë në karantinë për të pritur testimin për COVID-19. Po ashtu, me veprime shtesë, ai ka urdhëruar që automjetet transportuese që hyjnë nga territori i Shqipërisë në emër të dezinfektimit të ngarkohen me taksë të veçantë, duke rënduar edhe më shumë lëvizjen e lirë dhe qarkullimin e mallrave.
Ky është absurditet! Hapet me Serbinë dhe e mbyllë Kosovën nga Shqipëria. I heq taksën Serbisë dhe ia vë Shqipërisë.
Ky është predikuesi i bashkimit kombëtar! Në fakt, këto veprime janë shqelmat e fundit të Kurtit nga zyra e uzurpuar! HTH /Lajmi.net/