Kryetari i Komunës Veriore të Mitrovicës, Goran Rakiq, ka ripërsëritur se ura e Ibrit nuk do të hapet dhe punët nuk do të rifillojnë pa garancitë për sigurinë e qytetarëve.

Sipas tij, punët do të rifillojnë në rivitalizimin e urës dhe të rrugës “Mbreti Peter I”, atëherë kur të ketë siguri për qytetarët, shkruan sot Gazeta “Zëri”.

Por, Rakiq më pas ka potencuar se fillimi i punimeve në rivitalizimin e urës do të fillojë atëherë kur kompanitë ndërtimore të angazhuara për rivitalizimin e urës dhe të zonës së këmbësorëve në pjesën veriore t’i zgjidhin mosmarrëveshjet që kanë.

“Hapja e urës nuk është më çështje politike, por çështje teknike rreth së cilës duhet të merren vesh kompanitë që janë duke punuar në rivitalizimin e urës. Ajo çka na intereson dhe për të cilën jemi të shqetësuar është siguria e qytetarëve. Këtë gjithmonë do ta kërkojmë dhe nga ky qëndrim nuk do të na lëkundë askush dhe asgjë”, ka thënë ai.