Sot bëhen tri vjet nga sulmi terrorist në Banjskë, ku më 24 shtator të vitit 2023 një grup i armatosur nga Serbia sulmoi Policinë e Kosovës në veri të vendit.

Në betejë me këtë grup kriminal, rreshteri i Policisë së Kosovës, Afrim Bunjaku, u va në krye të detyrës dhe policë të tjerë u plagosën.

E sot familja e heroit të Kosovës, Afrim Bunjaku, ka hapur dyert për pritje në trevjetorin e rënies së tij, në përkujtim të rreshterit të Policisë së Kosovës që u vra më 24 shtator 2023 në sulmin terrorist në Banjskë të Zveçanit.

Familjarë, të afërm, miq dhe qytetarë kanë nisur të mblidhen për të përkujtuar Bunjakun, i cili u vra gjatë përleshjes me grupin e armatosur që sulmoi Policinë e Kosovës në veri të vendit.

Zyrtarë shtetërorë të Republikës së Kosovës këtë sulm e kanë quajtur akt agresioni nga Serbia ndaj shtetit të Kosovës, transmeton lajmi.net.

Përgjegjësinë për organizimin e sulmit e mori përmes avokatit të tij, Milan Radoiçiq, ish-nënkryetar i Listës Serbe, i cili vazhdon të jetë i lirë në Serbi.

Prokuroria Speciale e Kosovës, më 11 shtator 2024 ka ngritur aktakuzë kundër Milan Radoiçiqit dhe 44 të tjerëve, për sulmin terrorist të 24 shtatorit 2023 në Banjskë të Zveçanit.

Aktakuza e Prokurorisë Speciale të Kosovës për sulmin e armatosur në Banjskë i ngarkon shumicën e tyre me terrorizëm dhe krime të rënda kundër rendit kushtetues dhe sigurisë së Republikës së Kosovës. Radoiçiq akuzohet, gjithashtu, për lehtësimin dhe financimin e kryerjes së terrorizmit dhe pastrimit të parave, ndërsa i gjithë grupi akuzohet se me përdorim të dhunës dhe armëve të rënda, ka tentuar të ndajë pjesën veriore të Kosovës – ku gjenden komunat me shumicë serbe – dhe ta bashkojë atë me Serbinë.

Me vizita, homazhe dhe vendosjen e gurthemelit të një obelisku në Banjskë, Policia e Kosovës dhe Ministria e Punëve të Brendshme do të shënojnë sot 3-vjetorin e rënies në detyrë të rreshterit Afrim Bunjaku.

Në hyrje të shtëpisë së familjes Bunjaku është vendosur fotografia e Afrim Bunjakut derisa familjarët do të presin përgjatë ditës qytetarë, familjarë, e shumë zyrtarë shtetërorë.

Në orën 12:00, në Banjskë të Zveçanit, do të vendoset gurthemeli i obeliskut kushtuar Bunjakut. Programi përkujtimor do të përmbyllet me një akademi në orën 20:00, në Sallën e Kuqe të Pallatit të Rinisë në Prishtinë./Lajmi.net/