Pas disa javësh paqartësish dhe mospajtimesh politike, është arritur dakordim ndërmjet Partisë Demokratike të Kosovës (PDK) dhe Lëvizjes Vetëvendosje (LVV) për procedimin e mëtejmë të Ligjit për Dhomat e Specializuara dhe Zyrën e Prokurorit të Specializuar.

Deputetja e PDK-së, Blerta Deliu-Kodra, ka bërë të ditur në mbledhjen e Komisionit për Legjislacion se pas negociatave me përfaqësuesit e shumicës parlamentare, palët janë pajtuar që ligji të procedohet për miratim në Kuvend, në formën aktuale, pa ndryshime në këtë fazë.

Deliu-Kodra ka sqaruar se, ndonëse PDK-ja kishte insistuar që ligji të amendamentohej gjatë kësaj faze të rishqyrtimit, me VV-në nuk është arritur marrëveshje për ndryshime konkrete. Sipas saj, shumica parlamentare ka interpretuar ndryshe Rregulloren e Kuvendit, duke vlerësuar se në këtë fazë nuk lejohet amendamentimi i ligjit.

Për këtë arsye, është vendosur që ligji të procedohet në Kuvend ashtu siç ishte miratuar më parë, ndërsa çdo ndryshim i mundshëm të trajtohet përmes një procesi të ri të amendamentimit.

Ligji për ndryshimin dhe plotësimin e Ligjit për Dhomat e Specializuara dhe Zyrën e Prokurorit të Specializuar ishte iniciuar nga deputetët e PDK-së dhe ishte miratuar në Kuvend më 6 tetor 2026, në shqyrtimin e dytë, me 88 vota për. Pas miratimit, ligji i ishte dërguar presidentes së vendit për shpallje.

Megjithatë, më 22 tetor, presidentja Justina Shiroka-Pula vendosi ta kthejë ligjin në Kuvend për rishqyrtim, pas një kërkese zyrtare të vetë Grupit Parlamentar të PDK-së, si sponsorizues të kësaj nisme.

Kthimi i ligjit në Kuvend erdhi në kuadër të procedurës kushtetuese të rishqyrtimit, ndërsa në qendër të diskutimeve ishin dispozitat që ndërlidhen me juridiksionin dhe mandatin e Dhomave të Specializuara, si dhe përputhshmëria e ndryshimeve të propozuara me detyrimet ndërkombëtare të Kosovës.

Ndryshimet e miratuara nga Kuvendi më 6 tetor synonin kufizimin e juridiksionit të Gjykatës Speciale, përfshirë periudhën kohore dhe territorin në të cilin ajo ushtron kompetencat e saj. Po ashtu, projektligji parasheh ndryshime lidhur me transferimin e rasteve që nuk përfshihen në juridiksionin e saj, kufizimin e dënimeve dhe mundësinë e faljes presidenciale për personat e dënuar.

Këto propozime kanë nxitur diskutime dhe reagime, veçanërisht lidhur me ndikimin e tyre në funksionimin e Dhomave të Specializuara dhe detyrimet që Kosova ka marrë përsipër në raport me këtë institucion.

Pas kthimit nga presidentja, ligji duhej të trajtohej sërish nga Kuvendi. Në këtë fazë, PDK-ja dhe VV-ja kanë pasur interpretime të ndryshme lidhur me mundësinë e amendamentimit të tij. PDK-ja ka konsideruar se ndryshimet mund të bëheshin gjatë rishqyrtimit, ndërsa përfaqësuesit e shumicës parlamentare kanë vlerësuar se Rregullorja e Kuvendit nuk e lejon një gjë të tillë në këtë fazë të procedurës.

Kësisoj, pas negociatave politike, palët janë pajtuar që fillimisht të procedohet versioni aktual i ligjit, ndërsa ndryshimet e mundshme të trajtohen përmes një procesi të ri ligjvënës.

Sipas Deliu-Kodrës, në Kuvend do të rivotohet versioni i njëjtë i ligjit që ishte miratuar më 6 tetor, ndërsa për miratimin e tij dhe tejkalimin e vetos së presidentes nevojiten së paku 61 vota.

Deputetja e PDK-së u ka bërë thirrje anëtarëve të Komisionit për Legjislacion që ta mbështesin procedimin e mëtejmë të ligjit, duke theksuar se dakordimi i arritur me shumicën parlamentare mundëson që çështja të kalojë në seancë plenare.

Tashmë mbetet të shihet nëse ligji do t’i sigurojë 61 votat e nevojshme në Kuvend dhe nëse pas miratimit do të nisë një proces i ri për amendamentimin e tij, ashtu siç ka paralajmëruar PDK-ja. /Lajmi.net/