“Përdhosje e sakrificës së mijëra dëshmorëve”: OVL UÇK në Pejë dënon ashpër fyerjet e Gërvallës ndaj Haradinajt
OVL UÇK Pejë ka dënuar ashpër deklaratate fundit të ministres së Punëve të Jashtme, Donika Gërvalla-Schwarz, duke i cilësuar ato si “fyerje të rënda” ndaj Ramush Haradinajt dhe luftës çlirimtare të UÇK-së. Në reagimin e tyre, OVL UÇK Pejë e quajti deklaratën e ministres, ku e cilëson Haradinajn si “gjeneral të vetëshpallur,” një “gënjeshtër të turpshme” dhe…
Lajme
OVL UÇK Pejë ka dënuar ashpër deklaratate fundit të ministres së Punëve të Jashtme, Donika Gërvalla-Schwarz, duke i cilësuar ato si “fyerje të rënda” ndaj Ramush Haradinajt dhe luftës çlirimtare të UÇK-së.
Në reagimin e tyre, OVL UÇK Pejë e quajti deklaratën e ministres, ku e cilëson Haradinajn si “gjeneral të vetëshpallur,” një “gënjeshtër të turpshme” dhe një përdhosje e sakrificës së dëshmorëve.
Komunikata e plotë pa ndërhyrje:
“Me keqardhje të thellë dëgjuam fyerjet e rënda të ministres së Punëve të Jashtme, Donika Gërvalla-Schwarz, ndaj Ramush Haradinajt dhe luftës së lavdishme të UÇK-së. Ta quash një komandant të betejave më të ashpra të luftës çlirimtare “gjeneral të vetëshpallur” është jo vetëm një gënjeshtër e turpshme, por edhe një përdhosje e sakrificës së mijëra dëshmorëve dhe luftëtarëve të UÇK-së.
Ramush Haradinaj nuk ishte i vetëm në front; mbi 920 luftëtarë ranë dëshmorë në krah të tij në Dukagjin, duke u përballur me makinerinë vrastare të Serbisë. Ata nuk luftuan për tituj, por për lirinë e Kosovës, për lirinë që sot e përfaqëson padenjësisht vetë ministrja Gërvalla-Schwarz, e cila, në vend që ta nderojë këtë sakrificë, zgjedh ta përçmojë.” – thuhet mes tjerash në reagim.
OVL UÇK në Pejë theksoi se është veçanërisht e dhimbshme që ministrja, si vajza e një simboli të qëndresës kombëtare si Jusuf Gërvalla, po e përdor pozitën e saj për të “përçmuar Ushtrinë Çlirimtare të Kosovës” dhe për të përçarë popullin, në vend që ta nderojë të kaluarën.
“Ajo që është edhe më e dhimbshme është fakti se Donika Gërvalla-Schwarz, vajza e Jusuf Gërvallës (njërit prej simboleve të qëndresës kombëtare) po e përdor pozitën e saj për të përçmuar Ushtrinë Çlirimtare të Kosovës. Ajo nuk po e nderon sakrificën e babait të saj, por po ia rrotullon eshtrat në varr me gjuhën e urrejtjes ndaj atyre që e bënë realitet lirinë për të cilën ai u flijua.
Ministrja Gërvalla-Schwarz është personi i parë në politikën e pasluftës që e përdor sakrificën e dëshmorëve për t’i sulmuar ata dhe për të njollosur luftën e shenjtë për liri. Kjo nuk sjell bashkim, por ndarje. Nuk forcon shtetin, por e përçan popullin. Nuk e nderon të kaluarën, por e shkel me përbuzje.
Turp!” – thuhet më tej në reagim.