Kuvendi i Kosovës do të mblidhet nesër për seancë solemne me rastin e 18-vjetorit të Pavarësisë së Kosovës.

Në njoftimin e Kuvendit bëhet me dije se seanca do të mbahet në orën 10:30.

Paraprakisht, mbledhje solemne do të mbajë edhe Qeveria e Kosovës.

Fillimisht, në orën 07:00, do të bëhet ngritja e Flamurit të Republikës së Kosovës.

Në orën 07:30 pastaj mbahet mbledhja e Qeverisë.

Më pas vazhdohet me nderime te Monumenti i të Pagjeturve dhe homazhe te Pllaka Përkujtimore e Fëmijëve të Vrarë, tek varri i Presidentit Historik Ibrahim Rugova, tek varri i veprimtari Adem Demaçi dhe në Kompleksin Memorial “Adem Jashari” në Prekaz.

Pas seancës së Kuvendit, vazhdohet me nderime te Monumenti “Heroinat” dhe pastaj është parakalimi i trupave të Forcës së Sigurisë së Kosovës dhe Policisë së Kosovës.

Në mbrëmje është pritja shtetërore nga Presidentja, Kryeministri dhe Kryeparlamentarja. Pastaj vazhdohet me Koncertin Solemn të Filharmonisë së Kosovës.