Ngjarja e rëndë ndodhi në tregun e Milotit në Kurbin. Sipas policisë, gruaja Violeta Donaj, banuese në Rrëshen, ka vrarë me pistoletë burrin Kujtim Donaj 42 vjeç.

Blutë e Kurbinit thonë se janë ende të paqarta motivet e këtij krimi në familje.

Sipas informacioneve të para, gruaja ka shkuar me pistoletë në dorë në treg, dhe menjëherë ka qëlluar ndaj bashkëshortit të saj, i cili punonte në pazarin e Milotit.

Menjëherë pas ngjarjes, gruaja ka tentuar të largohet por ndërhyrja në kohë e forcave policore, ka bërë të mundur kapjen dhe arrestimin e saj në flagrancë si dhe sekuestrimin e pistoletës me të cilën është kryer krimi.

“Grupi hetimor në bashkëpunim me Prokurorinë e Rrethit Gjyqësor Kurbin, po vazhdojnë hetimet në vendngjarje për zbardhjen e plotë të rrethanave të ngjarjes”, përfundon një njoftim paraprak i policisë.