“Sulltani” i ri i Turqisë, pallati i 350 milionë dollarëve me 1,000 dhoma
Presidenti i Turqisë, Recep Tayyip Erdogan po shpërngulet në të ashtuquajturin Pallat i Bardhë, në periferi të Ankarasë, ku e pret rezidenca e re, ndërtimi i së cilës kushtoi 350 milionë dollarë.
Bota
Ky objekt madhështor, për të cilin kritikët thonë se paraqet vetëm dëshmi të re për qëllimet autokratike të Erdoganit, ka 200,000 metra katrorë dhe 1,000 dhoma. Nga ana e arkitekturës, ai bashkon stilet e ndërtimit modern dhe ato nga koha e sulltanëve të dinastisë Selcuk, nga e cila u zhvillua mbretëria otomane.
Për pranimin e parë në këtë pallat Erdogani e ka zgjedhur kremtimin gjatë kësaj jave të shpalljes së Turqisë moderne, në vitin 1923, nga ana e Kemal Mustafa Ataturkut.
Pos vërejtjeve të ekologëve që Pallati është ndërtuar në zonën e mbrojtur natyrore Beshtepe të Ankarasë, lajmi.net transmeton se edhe më e brengosur është opozita turke, e cila thotë se me shpërnguljen e Erdoganit në këtë pallat po përshpejtohet kalimi nga sistemi parlamentar në atë presidencial.
Udhëheqësi konservator Erdogan, me kalimin në Pallatin e Bardhë dëshiron ta lërë prapa vetes trashëgiminë sekulare të Ataturkut, pasi do që të largohet nga vila në Cankaya, e cila ka qenë rezidencë e 12 presidentëve të kaluar të Turqisë.
Erdogan ka paralajmërua se po arrin koha e “Turqisë së re”, kështu që mendohet se kjo shpërngulje mund të jetë pjesë e projektit të tij.
Ersin Kalaycioglu, profesor i shkencave politike në Universiteti e Stambollit Sabanci, pohon se Erdogani sipas të gjitha gjasave në këtë mënyrë dëshiron të shkëputet nga e kaluara.
“Kjo do të thotë se ai nuk dëshiron të bëhet një nga ish-banorët e rezidencës Cankaya”.