Deputeti Muhamet Mustafa, i cili është propozuar për Kryesues të Komisionit Hetimor Parlamentar për PTK’në, thotë se Kuvendi i Kosovës nuk guxon të amnistojë gjërat e paligjshme nga frika se kësaj ndërmarrje mund t’i zvogëlohet vlera.

Mustafa vlerëson se vlera PTK’së i është ulur më herët jo tani që po shikohet të veprohet ligjërisht me të.

“Kuvendi nuk mund të pranojë një logjikë të tillë që është rrezik t’i zvogëlohet vlera PTK’së e ta privatizojmë Ligj e pa Ligj. Kjo nuk shkon”.

“Kuvendi duhet të ushtrojë kontrollin dhe duhet bëjë presion për ushtrim të Ligjit sipas procedurave. Sa i përket humbjes së vlerës, nëse i ka humb është për shkak se është vonuar pesë vjet, jo pse Kuvendi po kërkon të zbatohet Ligji”.

Mustafa thotë se bojkoti i PDK’së në Kuvend është i paarsyeshëm e që nuk ndodh askund në botë.

“Nuk është në rregull dhe nuk është e zakonshme, mungesa e partisë në pushtet dhe aleatëve të saj në koalicion është për çdo kritikë, nuk besojë që ka ndonjë Kuvend në botë ku partia në pushtet dhe qeveria e bojkotojnë seancën e Kuvendit, pa asnjë shpjegim, ata duhet të shpjegohen”.

“Arsyetohen me fushatë, por zgjedhjet janë lokale, jonacionale dhe nuk mund të arsyetohet kjo mungesë e tyre”.

“Partia në pushtet ka një përgjegjësi shumë të madhe, ka marr votën e votuesve që të punojnë në institucione jo që t’i bllokojnë ato dhe pamundësojnë funksionimin e tyre. Ata besojë e dinë këtë dhe duhet heqin dorë nga kjo praktikë”.