Është fushata e tretë që Isa Mustafa u premton prishtinasve furnizim të pandërprerë me ujë, e janë gjashtë vjet të udhëheqjes së tij, por rubinetat në kuzhinat dhe banjot e tyre edhe më tej me orë të tëra mbesin pa të.

Bazuar në premtimet e mëhershme, prishtinasit do të duhej tani ta kujtonin furnizimin me ujë si një ëndërr të keqe të së shkuarës. Por, ky problem është larg për t’u zgjidhur.

Pak kohë pasi u arsyetua se nuk ka pasur kompetenca për zgjidhjen e problemit, Kryetari i Komunës së Prishtinës, Isa Mustafa, ia nisi shpalosjes së planit të vet për investim në vlerë prej 60 milionë euro që ta heqë qafe këtë problem që po i rri si gur në qafë Kryeqytetit.

Agron Demi, Drejtor Ekzekutiv i Institutit për Studime të Avancuara (GAP) thotë për lajmi.net se furnizimi 24 orësh me ujë të pijshëm është njëri nga premtimet e përsëritura të Mustafës nëpër fushata zgjedhore.

Sipas tij, Kryetari aktual i Prishtinës, i cili garon për një mandat të tretë nën siglën e LDK’së, deri më tani është arsyetuar se problem për zgjidhjen e problemit të ujit është mungesa e kompetencave të Komunës në Ujësjellësin Regjional “Prishtina”.

“Në tendencë për të larguar fajësinë, është përdorur loja politike e akuzave ndërpartiake”.

“Deri më tani, Kryetari aktual i Prishtinës Isa Mustafa ka thënë se Kompaninë Regjionale të Ujësjellësit ‘Prishtina’ e ka marrë SHIK’u. Pra çështja ka qenë se dy partitë (LDK dhe PDK) kanë tentuar të sulmojnë njëra-tjetrën dhe nuk janë munduar që të zgjidhin problemin”.

Demi, organizata e të cilit monitoron punën e pushtetit lokal nëpër Komunat e Kosovës, nënvizon se ndër problemet kryesore në mungesën e ujit nuk është vetëm ujësjellësi por edhe humbjet që shkaktohen nga rrjeti i dëmtuar që është kompetencë e Komunës së Prishtinës.

“Një problem tjetër është se me rastin e dhënieve të lejeve për ndërtime të reja, Komuna e Prishtinës nuk e pyet fare ujësjellësin se a ka kapacitet të mjaftueshëm të ujit që të bëhen lidhje të reja”.

“Gjithashtu, në aplikimin e disa kompanive ndërtimore për të marrë leje për lidhje të reja, Ujësjellësi ka kërkuar nga ato që të zhvendosin tubat e ujësjellësit. Mirëpo, një gjë e tillë nuk është përfillur nga kompanitë dhe me këtë rast është dëmtuar rrjeti. Duke pasur parasysh këto dëmtime, në Prishtinë mund të themi se afro 50 për qind e ujit humb si pasojë e dëmtimeve në rrjetin shpërndarës”.

Sipas Agron Demit, kandidati i LDK’së për Kryetar të Prishtinës ka bërë edhe premtime tjera të cilat i ka përsëritur në tri fushata zgjedhore.

“Ai këtë e argumenton me faktin se nuk është aprovuar Ligji për Prishtinën. Ai ka thënë se mungesa e këtij Ligji ka bërë që të mos ketë mundësi të ndërtojë Spitalin Rajonal, të cilin e ka premtuar në dy zgjedhjet e kaluara. Mirëpo, në këtë Ligj nuk thuhet se Komunës nuk i lejohet të menaxhojë me nivelin sekondar të shëndetësisë”.

“Ne ende nuk kemi mundur të shohim një planprogram të LDK’së për këto zgjedhje. Një program të tillë Isa Mustafa e ka pasur në zgjedhjet e kaluara. Dhe ne nuk kemi mundur të krahasojmë premtimet e mëhershme të tij me ato të tashmet. Gjatë fushatave të kaluara, Mustafa ka premtuar edhe tri parkingje nëntokësore që do të ndërtoheshin me partneritet publiko-privat, e të cilat nuk i ka realizuar”.