Ishte zëvendësministri i Financave, Isni Kilaj, nga PDK-ja, i cili deklaroi ditë më parë se në këtë dikaster qeveritar partneri i koalicionit (LDK) ka bërë shumë shkelje dhe një gjë e tillë, sipas tij, ka ndodhur edhe në institucione tjetra.

Kilaj e ka akuzuar ministrin Avdulla Hoti se kohëve të fundit ka bërë punësime të anëtarëve të LDK-së në ministri, shkruan sot gazeta ‘Zeri’.

Se ndasitë janë të mëdha brenda këtij koalicioni, flasin edhe akuzat që anëtari i kryesisë së Partisë Demokratike të Kosovës (PDK), Xhavit Haliti, bëri në drejtim të partnerit të koalicionit, LDK-së. Në një intervistë në mediumin publik, ditë më parë, Haliti ka thënë se njerëzit e LDK-së kanë kontribuar në akuzat ndaj eprorëve të UÇK-së.

Po ashtu ditë më parë, kryetari i Pejës, Gazmend Muhaxheri, ka shkarkuar dy drejtorë komunalë të PDK-së, pasi që nuk e votuan rishikimin e buxhetit.

Por pavarësisht këtyre përplasjeve dhe akuzave, zyrtarët e dy partive kanë theksuar se koalicioni në nivelin qendror nuk do të prishet.

Anëtari I kryesisë së PDK-së, Xhavit Haliti, ka thënë për gazetën “Zëri” se nuk e prishin koalicionin me LDK-në, siç thotë ai, pse janë nervozuar dy njerëz.

Të parëndësishme këtë përplasje për nivelin qendror po e vlerësojnë edhe zyrtarët e LDK-së. Nënkryetari i kësaj partie, Haki Rugova, thotë për gazetën “Zëri” se koalicionin mund ta prishin vetëm kryetarët e dy partive, ata që edhe e kanë nënshkruar koalicionin në nivel qendor.