Kur do t’ju kthehet Isa Mustafa aktiviteteve politike, tregon ish-këshilltari i tij
Ish-kryeministri Isa Mustafa, i cili është edhe kryetar i Lidhjes Demokratike të Kosovës, ende nuk dihet se kur do t’ju kthehet aktiviteteve politike në terren.
Lajme
Mustafa që qëndroi afër tre muaj në Gjermani për shërim, të dielën është kthyer në Kosovë. Edhe pse sipas zyrtarëve të LDK-së, gjendja tij shëndetësore është përmirësuar, ende nuk dihet se kur Mustafa do të dalë në teren për ta ushtruar funksionin e kryetarit të partisë.
Ish-këshilltari në qeveri, Bajram Gecaj, ka thënë për lajmi.net, se dalja në teren e Mustafës varet nga terapitë që i janë caktuar nga mjekët.
Gecaj ka thënë se kryetari i tyre edhe sa ka qenë në Gjermani është konsultuar vazhdimisht për vendimet e rëndësishme që ka marrë LDK dhe se do të vazhdojë të njëjtë gjë.
“Mustafa edhe sa ka qenë në Gjermani, kryesia e LDK-dhe strukturat e saj janë konsultuar më të dhe ato konsultime do të vazhdojnë edhe tash. A do të dalë në teren ajo, varet prej terapisë që ja kanë dhënë mjekët”, është shprehur Gecaj për lajmi.net.
Mustafa ishte dërguar në Gjermani në mesin e muajit janar, pas përkeqësimit të gjendjes shëndetësore, ku po mjekohej në Spitalin Amerikan në Prishtinë.
Ishte raportuar se kryetari i LDK-së është prekur nga sindroma “Guillain-Barré syndrome”. Trajtimi i kësaj sëmundjeje, për njerëzit që nuk kanë aktivitet të fortë fizik, apo për ata të cilët janë më në moshë, është shumë i vështirë dhe sëmundja mund të lërë pasoja.
Sindroma GBS është një çrregullim në të cilin sistemi imunitar i trupit sulmon një pjesë të sistemit nervor periferik./Lajmi.net/