Në këtë konferencë, e cila është organizuar nga programi KOSME, ministri Murati tha se kjo ngjarje shërben që bizneset të krijojnë njohje mes vete, por dhe që të tërhiqen investime për në Kosovë.

“Ministria e Diasporës si shtyllë kryesore të punës së vet ka bashkëpunimin me afaristët nga diaspora. Vetë krijimi i rrjetit të bizneseve ka për qëllim që me anë të këtij interaksioni të njihen bizneset mes veti, të bëjnë biznes së bashku, të gjejnë rrugën e vet për investime të kanalizuara në Kosovë por edhe tërheqja e investimeve të tjera të huaja në Kosovë”, tha Murati.

Murati, po ashtu, theksoi se Ministria e Diasporës, ka si projekt edhe ruajtjen e identitetit kulturor dhe kombëtar në diasporë.

Murati gjithashtu përmendi programin e përbashkët për mësimin plotësues të gjuhës shqipe, marrëveshje që pritet të nënshkruhet të hënën mes Republikës së Kosovës dhe Republikës së Shqipërisë.

Po ashtu u paralajmërua edhe nënshkrimi i marrëveshjeve për organizimin e përbashkët të aktiviteteve kulturore me Republikën e Shqipërisë si dhe hapjen graduale të Qendrave të përbashkëta Kulturore në diasporë.

Në këtë konferencë, së bashku me ministrin Murati, punën e tyre e prezantuan edhe Ministrja e Tregtisë dhe Industrisë, znj. Hikmete Bajrami, z. Safet Gërxhaliu nga Oda Ekonomike e Kosovës, z. Kujtim Dobruna nga ECIKS dhe kryetari i nderit i Unionit të Bizneseve Shqiptarë në Diasporë, z. Lazim Destani.