I dyshuari për vrasjen e Rrahman Ukës del sot ose nesër para Gjykatës
Sot pritet që prokuroria ta dorëzojë kërkesën për caktimin e seancës për Masar Gërdovcin, i dyshuar për vrasjen e Rrahman Ukes, rojës së sigurimit e kafenesë “Bon Vivant”, në Prishtinë.
Lajme
Këtë e ka konfirmuar për KALLXO.com, avokati mbrojtës i të dyshuarit Gërdovci, Asdren Hoxha.
“Sot prokuroria do ta dorëzojë kërkesën për caktimin e seancës ndaj klientit tim ndërsa më pas gjyqtari e ka mundësinë që ta mbajë seancën sot apo nesër”, tha avokati Hoxha.
Rrahman Uka është vrarë pasditen e së hënës në rrugën “Rexhep Luci” në qendër të Prishtinës, afër kinemasë ABC.
Dorasi dyshohet të jetë Masar Gërdovci, i cili fillimisht kishte shtënë me armë zjarri në drejtim të Ukës dhe nga plagët e marra ky i fundit nuk kishte mbijetuar.
Masar Gërdovci ishte arrestuar nga Policia e Kosovës menjëherë pas rastit të ndodhur.