Haliti:Thaçi President, Kushtetuta s’flet për opozitën
Në deklarimin e tij në debatin e transmetuar në televizionin publik, Haliti u shpreh se Kushtetuta e përcakton që kandidati për President duhet t’i ketë 81 vota ndërsa në raundin e tretë 61.
Lajme
Xhavit Haliti, nënkryetar i Kuvendit të Kosovës, deklaroi sot se Hashim Thaçi do të zgjidhet President i republikës dhe se këtë nuk mund ta pengojë opozita.
“Kushtetuta nuk thotë që duhet të jetë e pranishme opozita në Kuvend, gjatë kohës kur votohet presidenti”, tha Haliti që vjen nga PDK.
Në deklarimin e tij në debatin e transmetuar në televizionin publik, Haliti u shpreh se Kushtetuta e përcakton që kandidati për President duhet t’i ketë 81 vota ndërsa në raundin e tretë 61.
Ai vazhdoi duke shpjeguar se Kushtetuta nuk e specifikon se ku duhet të votohet Presidenti, vetëm se duhet të ketë kuorum, kundër kandidat dhe vota të mjaftueshme.
Pavarësisht të gjithave, ai në emisionin ‘Debat’ në RTK, u shpreh se është i bindur se Hashim Thaçi do të votohet për president qysh në raundin e parë.
“Nuk di që ka ndonjë pengesë, përveç që nëse nuk ka kuorum në Kuvend dhe nuk merr vota”, tha Haliti.
Lidhur me disa opinione brenda LDK-së që kanë thënë se janë kundër Thaçit për president, Haliti tha se ata janë në koalicion me ta dhe beson në LDK.
“Besoj që kryesia e LDK dhe organet e saj janë deklaruar në shumicë që LDK e mbështet Thaçin president”.
Sa i përket mbajtjes së seancës së Kuvendit të Kosovës, nënkryetari i Kuvendit, Xhavit Haliti tha se ende nuk ka kërkesë për mbajtje të seancës.
“Por afati kushtetues është 5 marsi kur duhet të jetë vendi me president”./lajmi.net