Gjykata Speciale gati, shpallet konkurs për kompletim të stafit (Dokument)
Pas vendimeve politike, tash në radhë janë veprimet praktike. Dhomat e Specializuara të Gjykatës Speciale të Kosovës, tashmë kanë filluar të kompletohen edhe me stafin nevojshëm.
Lajme
Në fakt, tash kanë filluar të shpallen konkurset për këtë institucion, i cili ligjërisht është i Kosovës, por praktikisht do të funksionojë në Holandë.
Lajmi.net ka siguruar konkursin e shpallur për kompletim të stafit të nevojshëm për Dhomën Speciale të Kosovës dhe Zyrën e Prokurorit Special.
Por është e çuditshme që në pjesën e konkursit për vendin e punës, jepen dy vende.
“Siç tregohet më poshtë – Hagë, Holandë apo Beograd, Serbi”, shkruan në konkurs, në pjesën e vendit të punës (Job Location).
Afati i rekrutimit të stafit të duhur, i cili më pas do të bëjë të mundur funksionalizimin e këtij institucioni, për të gjitha detyrat, është vënë data 15 qershor.
Në këtë konkurs të siguruar nga lajmi.net, për funksionalizimin e Dhomave të Specializuara të Gjykatës Speciale, kërkohet i tërë stafi i nevojshëm, për të gjitha nivelet.
Sipas konkursit, këtij institucioni i duhen përkthyes shqip-anglisht, por askund nuk kërkohet serbisht-anglisht.
Në konkurs kërkohen edhe zyrtarë për buxhet, zyrtar për prokurim, konsulent ligjor, prokurorë, e persona të tjerë që në total janë 45 zyrtarë, raporton lajmi.net.
Në pjesën e dytë të konkursit jepen sqarime për kushtet që kandidatët duhet të plotësojnë për secilin vend të punës, si dhe detyrat që do të mbulojnë, përfshirë edhe kohëzgjatjen e kontratës e cila është 12 muaj.
Por që dikush të bëhet pjesë e këtij institucioni, ai ose ajo duhet të jetë shtetas i Bashkimit Evropian, ose shtetas i një prej vendeve kontribuuese në këtë institucion që përfshinë Kanadanë, Norvegjinë, Zvicrën, Turqinë dhe SHBA-në.
Pjesa tjetër e konkursit përfshinë detaje që një kandidat duhet të dijë si njohjen perfekt të gjuhës angleze, përgatitjen profesionale, biografinë, e detaje të tjera të ngjashme./lajmi.net