Gjilani me këtë çmim paraqitet si shembulli më i mirë për investime të huaja në rajon dhe kjo është vlerësuar si tejet e rëndësishme nga ana e kreut të Gjilanit, Lutfi Haziri, i cili pranoi këtë çmim.

“I falënderoj organizatorët e këtij panairi ndërkombëtar për çmimin. Është shumë i rëndësishëm fakti që Gjilani është ranguar me Barcelonën dhe Cyrihun. Në këtë panair ne kemi krijuar një brend të ri për komunën që nuk e kanë bërë të tjerët dhe do të merret parasysh nga investitorët. Besoj dhe shpresoj shumë që do të ketë investime të mëdha në Gjilan, duke përmirësuar kualitetin e jetesës”, është shprehur Haziri, i cili ka zhvilluar disa takime me investitorët e huaj.

Haziri me këtë rast u ka ofruar investitorëve përkrahjen e plotë të tij, duke garantuar politika të favorshme fiskale.

Ai ka paraqitur disa projekte tejet të rëndësishme për investitorët, siç është infrastruktura, zhvillimi i qendrës së qytetit, përkatësisht rindërtimin e kësaj pjese të qytetit, ku gjenden tri objekte të mëdha kapitale që përfshijnë administratën publike, një objekt multikulturor, kinematë moderne e sallat e teatrit dhe hotelin me standarde të reja evropiane të hotelerisë etj.

Komuna e Gjilanit ishte përzgjedhur që në muajin tetor, pasi ka respektuar të gjitha kriteret zhvillimore komunale për të mbërritur në Cyrih, njofton shërbimi për informim i kësaj komune. /KosovaPress/