Pse pikërisht gjelin e shqiptarit, a nuk kishte gjela të tjerë në Zvicër?

“Ky është gjel i veçantë. Ja, shikoje, sa elegant është dhe krenar. Është po ashtu racë e vjetër dhe shumë karakteristike. Gjelin e bën të veçantë edhe këndimi i tij “,  po na shpaloste me entuziazëm disa nga fshehtësitë e hobit të tij, kultivimit të pulave.

“Racë shumë e vjetër dhe ndër më të ruajturat në mesin e racave të pulave në Zvicër “, thotë Zahiri.

Me gjelin e Ibrahim Zahirit është bërë një set i fotografive dhe një video klip nga një agjenci e marketingut e porositur nga UBS.

Ibrahimi është anëtar aktiv dhe kryetar i shoqatës për kafshët e imta (Kleintiere Schweiz) në Regensdorf.

Ai është njëri nga kultivuesit e rrallë shqiptarë të pulave në Zvicër.

Si pjesë e kësaj shoqate, Zahiri kishte fituar të drejtën të sigurojë një kopsht për të kultivuar shpezë të ndryshëm sidomos të  racave të veçanta të pulave në mesin e 100 racave që janë të njohura në Zvicër.

Si u bë që vendosi të merrej me kultivimin e pulave?

Zahiri kishte filluar më 2002 kultivimin e racave të ndryshme të shpezëve në një kopsht mbi Regensdorf.

Ai ka 24 pula të ngjyrave të ndryshme, aq i lejohet me rregullore për të siguruar hapësirë të mjaftueshme familjeve të pulave.

Zahiri kishte migruar në moshën 13 vjeçare në Zvicër. Prej atëherë ishte treguar dashamirës i kafshëve madje ishte dhe anëtar i organizatës për përkujdesjen ndaj kafshëve “Tier Heim”. Ai kishte sjellë këtu me vete pasionin e ruajtjes së kafshëve prej Kosovës. Në mesin e shumë aktiviteteve në Zvicër, ai ka zgjedhur si hobi kultivimin e pulave, ruajtjen e racës dhe rritjen e numrit të kultivuesve tjerë.

Zahiri merr pjesë për çdo vit në prezantime të ndryshme të kafshëve nëpër Zvicër.

Me këtë lloj gjelash që e kultivon Zahiri, ai disa herë ka zënë vendin e parë në prezantimet  e ndryshme të shpezëve.

“Aty si kriter merren parasysh pendlat, ngjyra, forma dhe paraqitja e tyre etj.”, thotë Ibrahimi me prejardhje nga Gjilani, ndërsa, bashkë me bashkëshorten e tij, përgatit me zell dhe dashuri gjelin e zgjedhur nga UBS, për ta fotografuar.

“E kishim kuptuar se për të përfaqësuar me dinjitet racat tona të pulave, rruga më e mirë ishte kultivimi në bazë të rregullave të këtushme. Të gjitha shpezët janë të regjistruara në shoqatën ” Kleintiere Schweiz “, tha Ibrahimi.

E gjithë familja e angazhuar me pulat

“Këtu e kalojmë një pjesë të mirë të kohës. Është argëtimi dhe preokupimi që më mban vital dhe me disponim të mirë mua dhe familjen time, sidomos dy fëmijët e mi që janë adhurues të kafshëve dhe natyrës”, thotë Ibrahimi.

Duke qenë jo vetëm kultivues i pasionuar por edhe njohës cilësor i historisë së pulave, ai merr pjesë çdo muaj në mbledhjet e shoqatës dhe nëpër seminare të ndryshme, që synim ka kultivimin e racave të veçanta të pulave në nivel vendi.

Ibrahim Zahiri ka për synim që pasionin e tij ta përcjell te bashkëkombësit tjerë, dhe me këtë ai ka treguar se shqiptarët në Zvicër nuk e kanë hobi vetëm futbollin por edhe ruajtjen e kafshëve dhe natyrës duke u bërë pjesë e shoqatave të vendit për ruajtjen dhe kultivimin e kafshëve.

Ibrahim Zahiri (Detailhandelsspezialist) është menaxher në disa filiale të rrjetit të shitoreve të  “Denner-it” në Zvicër. Shqiptari me origjinë nga Kosova merret edhe me politikë. Ai është zgjedhur vitin e kaluar këshilltar në Asamblenë e Komunës së Glatbrugg-ut.

Në fakt Zahiri gjithmonë është marrë me aktivitete të ndryshme, duke u angazhuar në fusha të ndryshme kulturore dhe sociale.

Për pesë vite radhazi ai ka qenë kryetar i këshillit të prindërve në shkollën më të madhe të kantonit të Cyrihut, kurse tash është kryetar i këshillit të prindërve në një shkollë tjetër (Oberstufe).

Gjithashtu ai është bashkëthemelues dhe bashkëiniciator për themelimin e shoqatës Glatt-Alb, e cila angazhohet në fushën e integrimit të shqiptarëve në Zvicër.

Nga vendlindja ka sjellë me vete pasionin për kafshët

Zahiri kishte migruar në moshën 13 vjeçare në Zvicër. Prej atëherë ishte treguar dashamirës i kafshëve madje ishte dhe anëtar i organizatës për përkujdesjen ndaj kafshëve “Tier Heim”. Ai kishte sjellë këtu me vete pasionin e ruajtjes së kafshëve prej Kosovës. Në mesin e shumë aktiviteteve në Zvicër, ai ka zgjedhur si hobi kultivimin e pulave, ruajtjen e racës dhe rritjen e numrit të kultivuesve tjerë. (albinfo)