Sepse, për pesë vite rresht, që kur erdhi në krye të LDK-së tinëzisht, duke e mashtruar elektoratin, vazhdoi rrugëtimin e tij të padenjë dhe të gabuar për një “eksperti” , e lëre më të një burrështetasi në postin e kryeministrit!

Unë, kam shkruar dhe folur qartë qe disa vite resht, e kam shprehur qëndrimin dhe bindjen time të thellë, se ky njeri nuk është i duhur për ta udhëhequr LDK-në dhe as Kosovën! Kam folur dhe e kam shprehur qëndrimin tim politik kundër koalicionit me PDK-në, kundër formës tinëzare që ka përdorur I. M. për t’i kapur majat e partisë dhe qeverisë, duke shkelur vendimin e KP të LDK-së për të mos bërë koalicion me PDK-në. Dhe, ashtu siç i ishte nisur punët me hile, ashtu rezultuan të gjitha, se i kishte bërë vetëm për interesin e tij personal dhe rrethi e ngushtë të servilosur ndaj tij.

Isa Mustafa, veç tjerash sot foli për duar të pastra..!? Paradoksale, kur e dimë se pikërisht ai ka më së paku të drejtë të flet për “duar të pastra”, sepse ai është njeriu i cili së bashku, me ish shefin e tij, ia kanë tjetërsuar popullit të Kosovës rreth gjashtëdhjetë milion euro nga Fondi i Republikës së Kosovës, dhe kjo nuk është diçka që është harruar nga populli dhe mërgimtarët. Fondi ishte dhe mbetet angazhimi dhe sakrifica e pakursyer e mërgimtarëve tanë patriotë, ai u themelua në vitin 1991 me qëllimin hyjnor që ta ndihmojë Kosovën si dhe rrugëtimin e saj drejt lirisë dhe pavarësisë!

Ai sot u shkarkua, e mori ndëshkimin parlamentar gjatë një spektakli parlamentar të orkestruar mirë nga PDK-ja dhe të iniciuar nga opozita parlamentare.

E shkarkuan ashtu siç e kishte merituar. Mbetet që ai dhe grupi i tij të zhytur në mashtrime, manipulime dhe nepotizëm të ikin sa më para nga LDK-ja, dhe që sot t’i hapin rrugën partisë rugoviane, të cilës ia njollosën emrin, parimet dhe filozofinë!

LDK-ja ka kuadro dhe njerëz me vlera, të cilët dinë, mund t’i realizojnë, t’i materializojnë dhe zbatojnë qëndrimet dhe proceset e mëtejme të LDK-së burimore. Janë gjallë njerëzit që me fanatizëm i kanë ruajtur dhe mbrojtur qëndrimet politike dhe vlerat e mirëfillta të kësaj partie.

LDK-ja është themeluar për të mbrojtur interesin nacional, brenda saj ka qindra njerëz që dhanë shumë për qëllimet madhore të kombit. Ata mbesin pranë qëndrimeve të veta me qëllimin e vetëm: dashurinë ndaj kombit dhe atdheut, lirisë dhe demokracisë!

10.05.2017