Kandidati për Kryetar të Prishtinës nga LDK, njëherësh Kryetari aktual, Isa Mustafa, ka thënë se Prishtina do të ketë furnizim të pandërprerë me ujë.

Ai ka paraqitur projektin 62 milionësh i cili është i financuar nga Komisioni Europian, Qeveria e Kosovës dhe nga Komuna e Prishtinës.

Projekti të cilin e udhëheq Komisioni Europian dhe në të cilin komuna ka marrë pjesë me 5 milionë euro, parasheh që deri në vitin 2016 të rregullohet e gjithë infrastruktura, dhe përfundimisht kryeqyteti të ketë ujë 24 orë.

Premtimi për furnizim me ujë ka zënë vend të rëndësishëm në fushatën e kandidatëve për Kryetar të Komunës së Prishtinës pas kritikave të kandidatëve opozitarë ndaj Isa Mustafës për mospunë në këtë çështje.

Mustafa ka shkruar në Facebook se ky projekt është i ndarë në tre faza.

“Faza e parë është e përfunduar që përfshinë intervalin kohor prej 2009-2013, ku si projekte kyçe janë ndërtimi i gypave në Kodra 1 dhe 2, poashtu ndërrimi i rrjetit të ujit në lagjen Tophane si dhe projekti më i madh që është rehabilitimi i fabrikës së ujit në Badovc (ndërtimi i rezervaurit 3,000 metër kub)”.

“Projektet e fazës së dytë 2011-2014 përfshinë mbrojtjen e burimeve të ujit në liqenin e Batllavës dhe Badovcit, ndërrimi i rrjeteve të ujit në lagjen Dodona, Bregu i Diellit dhe Lagjen e Muhaxherëve, si dhe ndërrimi i gypave në Mat dhe Taukbashqe”.

“Projekti i fazës së tretë 2012-2016 është ndërtimi i fabrikës së ujit në Shkabaj me kapacitet prej 700 litra ujë për sekond”.

Mustafa gjithashtu ka folur për projekte të tjera që janë kryesisht ndërrimi i gypave të ujit në disa lagje të Prishtinës si dhe ndërtimin e rezervuarve në lagjet Veternik, Mat 3, Shkabaj.

Isa Mustafa thotë se përfituesit e vetëm të këtij projekti janë qytetarët të cilët do të kenë ujë 24 orë.

“Qytetarë të nderuar, këto janë faktet se ju do të keni ujë 24 orë”- ka shkruar në mesazhin e tij në Facebook, Isa Mustafa.