Sipas një komunikatë nga Prokuroria Speciale e Kosovës, të pandehurit Qazim Beqaj e Gazmend Halimi, si grup i strukturuar e i organizuar kriminel, së bashku me persona NN nga Republika e Shqipërisë, me qëllim që vetes t’i sjellin përfitime financiare të drejtpërdrejta, gjatë vitit 2011 disa personave nga Republika e Kosovës, të cilët kanë dashur të udhëtojnë jashtë vendit, në këmbim të shumave të ndryshme financiare, u kanë siguruar pasaporta të Republikës së Shqipërisë.

Me këtë, së bashku me personat NN nga Republika e Shqipërisë, ata kanë kryer veprën penale “Krim i organizuar” dhe “Kontrabandimi me emigrantë”.

Sipas aktakuzës, të pandehurit Gazmend Halimi e Qerim Ramani, me qëllim që vetes t’i sjellin përfitime pasurore të kundërligjshme, një të dëmtuari i kanë paraqitur fakte të rrejshme se kanë një të njohur në Policinë e Shqipërisë dhe se munden t’ia rregullojnë pasaportën e Shqipërisë për shumën prej 5,000 eurove.

I dëmtuari ka kundërshtuar t’ia japë këtë shumë të të hollave dhe të pandehurit disa herë kanë shkuar te shtëpia e të dëmtuarit, duke i bërë presion dhe duke e kërcënuar që t’ua japë të hollat. I dëmtuari nga frika ka arritur të sigurojë dhe t’ua japë 2,300 euro.

Po sipas aktakuzës, Halimi, duke u paraqitur rrejshëm si person zyrtar i lartë në Policinë e Kosovës, ka vënë në lajthim disa persona, duke u thënë se në këmbim të shumave të caktuara financiare ai mund t’ua lirojë të afërmit nga paraburgimi.

Me këtë ky i pandehur ka kryer veprat penale“Prezantimi i rremë si person zyrtar” dhe “Mashtrim” .

Të pandehurve u janë gjetur edhe armë. Të pandehurit Halimi i është gjetur një pushkë automatike AK 47, me 12 fishekë dhe një mortajë dore. Edhe të dyshuarve tjerë u janë gjetur armë të ndryshme.

Aktakuza është ngritur nga një prokuror vendës i Prokurorisë Speciale të Republikës së Kosovës, i cili i ka propozuar Gjykatës që, pas administrimit të provave dhe përfundimit të shqyrtimit gjyqësor, të pandehurit të shpallen fajtorë dhe të gjykohen sipas ligjit.