PDK thotë se Bahtiri e ka politizuar sulmin e një qytetari të ndodhur sot në ambientet e Komunës ndaj tij edhe pse e ka njohur dhe e ka ditur se ai është simpatizant i AKR-së.

“Është e çuditshme se si një kryetar komune me aq lehtësi tenton ta hedhë në një rrafsh tjetër zhgënjimin e atij djali të ri, të cilin si shumë të tjerë i ka mashtruar për punësim. Qasja e tillë e Agim Bahtirit, jo që është e gabueshme dhe tendencioze, por është e padurueshme për qytetarët mitrovicas. Në vend se të shprehim keqardhje për sulmin që ka ndodhur, Agim Bahtiri na detyron që, për hir të së vërtetës, të ofrojmë për opinionin disa fotografi që dëshmojnë se sulmuesi është simpatizant i AKR-së, i cili gjatë gjithë fushatës ishte afër Agim Bahtirit”, thuhet në reagimin e PDK-së.

“Ne shprehim keqardhje për qytetarët tanë që i ka sjellë në një situatë të rëndë. Dështimin e tij Agim Bahtiri po tenton ta justifikojë me akuza të tilla duke dashur të zhvendosë vëmendjen tjetërkah. Ky njeri duhet të bindet se pozita e kryetarit të Komunës është përgjegjësi e madhe dhe jo vend për aventura politike”, përfundon reagimi i PDK-së së Mitrovicës.