Policia e Kosovës ka zhvilluar një hetim lidhur me dyshimet për keqpërdorim të pozitës zyrtare në procedurat e tenderëve publikë. Si rezultat, është arrestuar një zyrtar i Agjencisë së Menaxhimit Emergjent (AME).

Siç ka raportuar Gazeta Express, i arrestuari është Lulzim Bajrami, zyrtar në AME.

Ai dyshohet se ka ndihmuar operatorë ekonomikë të fitojnë tenderë të caktuar, duke përshtatur kriteret e përcaktuara nga autoritetet kontraktuese në kundërshtim me ligjin.

Vlera e përgjithshme e tenderëve të dyshuar kap shumën mbi 8.8 milionë euro.

Pas intervistimit, Bajrami është dërguar në mbajtje për 48 orë.