Cesc Fabregas i ka dhënë fund eksperiencës në Barcelonë, për t’u transferuar në Chelsea.

Futbollisti spanjoll e ka pranuar se ndihet mirë që do të luajë për ekipin londinez, të cilit do t’i bashkohet pas Botërorit.

“Fuqishëm besoj se Chelsea është opsioni më i mirë. Ata i përmbushin ambiciet e mia të futbollit, urinë dhe dëshirën time për të fituar tituj. Tani jam plotësisht i përqendruar dhe mezi pres të luaj”, deklaroi ish futbollisti i Arsenalit. 

“Dua t’i falënderoj të gjithë në Barcelonë, ku i kalova tri vjet të mrekullueshëm. Ishte ekipi i fëmijërisë sime dhe do të jem gjithmonë krenar dhe i nderuar që e kam pasur mundësinë të luaj për një klub aq të madh”.

“Mendoj se është koha e duhur për t’u rikthyer në Premierligë. I kam konsideruar të gjitha ofertat dhe në fund kam besuar se Chelsea është opsioni më i mirë”, përfundoi ai.

Marrëveshja është konfirmuar edhe nga Barcelona përmes një komunikate.