Një shtetas i Kosovës është dëbuar nga Zvicra pasi tentoi të punësohej duke përdorur dokumente të falsifikuara polake. Gjykata Administrative ka konstatuar se urdhri për largimin nga vendi, i lëshuar nga Zyra për Migrim dhe Integrim (MIKA), ishte i ligjshëm dhe proporcional.

Ngjarja ndodhi në komunën Frick, ku personi në fjalë u paraqit në zyrën e banorëve duke pretenduar se ishte shtetas polak, duke paraqitur një pasaportë, kartë identiteti dhe patentë shoferi të falsifikuara. Pas konsultimit me autoritetet polake, MIKA konstatoi se dokumentet ishin të rreme. Më pas, pas pothuajse një muaji, personi u arrestua nga policia kantonale dhe u vendos në qendrën e paraburgimit në Frick.

Fillimisht, siç raporton albinfo.ch, i arrestuari vazhdoi të këmbëngulte në identitetin e rremë, por gjatë marrjes në pyetje pranoi se ishte shtetas i Kosovës dhe kishte përdorur një emër tjetër.

Ndryshe nga qytetarët e Polonisë – një shtet anëtar i BE-së/EFTA-s që gëzon përparësi në qasjen në tregun e punës në Zvicër, shtetasit e vendeve të treta, si Kosova, përballen me kushte më të rrepta për punësim.

Gjykata Administrative theksoi se përdorimi i dokumenteve të falsifikuara për të fituar të drejtën e punës përbën rrezik për arratisje dhe shmangie të urdhrave zyrtarë. Sipas gjykatës, paraburgimi ishte i nevojshëm për të siguruar largimin e tij nga vendi dhe nuk kishte masa më të lehta që mund të zbatoheshin në këtë rast.

Po ashtu, nuk u paraqitën rrethana familjare apo shëndetësore që do ta bënin paraburgimin të dukshëm si disproporcional. Për rrjedhojë, Gjykata Administrative mbështeti vendimin për paraburgim në pritje të deportimit dhe e cilësoi të ligjshëm dhe të arsyeshëm urdhrin e largimit nga Zvicra dhe zona Shengen.