Autoritetet amerikane kanë vendosur një shtetrrethim në zonat e kërcënuara të Los Anxhelosit për shkak të zjarreve që kanë shkatërruar zonën.

Ora policore vlen për zonat që janë evakuuar nga zjarret në Palisades dhe Eaton dhe do të jetë në fuqi nga ora 18:00 sonte deri në orën 6 të mëngjesit të së shtunës me kohë lokale, njoftoi sherifi Robert Luna në një konferencë për shtyp.

Zjarret në qarkun e Los Anxhelosit kanë djegur mbi 14.500 hektarë, një zonë më e madhe se disa nga qytetet më të dendura të populluara në Shtetet e Bashkuara.

Një burrë i arrestuar me dyshimin se ka tentuar të ndezë zjarrin në Woodland Hills dje nuk do të akuzohet, njoftoi ndihmës shefi i policisë së qytetit, Dominic Choi.

Policia mori një raport për një burrë që po përpiqej të ndezte zjarrin pas një furgoni. Banorët të cilët e vunë re të dyshuarin e ndaluan atë derisa mbërritën oficerët. Është publikuar një video ku shihet i dyshuari në pranga.

Choi shpjegoi se gjatë hetimit, nuk u gjetën prova të mjaftueshme që njeriu në të vërtetë po përpiqej të ndezte zjarrin.

Kushdo që gjendet në zonat ku është në fuqi një shtetrrethim do të arrestohet, njoftoi Sherifi i Qarkut të Los Anxhelosit. Ai paralajmëroi të gjithë grabitësit se ata do të gjobiten 1 mijë dollarë, madje edhe burgim të mundshëm.

Prokurori i qarkut në Los Anxhelos, Nathan Hochman, mbështeti paralajmërimin e Luna, duke u zotuar se do të ndiqte penalisht këdo të arrestuar për shkeljen e shtetrrethimit. Ai theksoi se grabitjet janë “një krim i neveritshëm”.

Kryebashkiakia e Los Anxhelosit Karen Bass tha se shefat e zjarrfikësve po punojnë me guvernatorin dhe sherifin për të siguruar mbështetjen e Gardës Kombëtare dhe për të parandaluar këdo që të përpiqet të shfrytëzojë tragjedinë. Ajo vuri në dukje se 2.5 milionë dollarë u mblodhën për rinovimin brenda 24 orëve.

Kujtojmë, të paktën 10 persona kanë humbur jetën nga zjarret në zonën e Los Anxhelosit. Rreth 93 mijë shtëpi dhe biznese janë pa energji elektrike, sipas PowerOutage.us. Kjo është një rënie e konsiderueshme nga e marta, kur të paktën 200 mijë klientë ishin pa energji elektrike.