Komandanti i misionit të udhëhequr nga NATO, KFOR, Gjeneral Major Enrico Barduani, ka autorizuar Forcën e Sigurisë së Kosovës (FSK) që të vendosë ekipe të Kërkim-Shpëtimit në zonën e liqenit të Ujmanit/Gazivodës, njofton KFOR.

“Autorizimi, i bazuar në arsye humanitare, është dhënë në përputhje të plotë me të drejtat dhe kompetencat e Komandantit të KFOR-it, me qëllim maksimizimin e përpjekjeve në vijim për të lokalizuar dhe rikuperuar një burrë 33-vjeçar që dyshohet se është mbytur në liqen, disa ditë më parë. Ky autorizim është i kushtëzuar me kërkesa dhe kufizime specifike të vendosura nga KFOR, i cili gjithashtu do të sigurojë sigurinë gjatë gjithë operacionit”.

“Përdorimi i ekipeve të SAR të FSK-së bie brenda mandatit origjinal të FSK-së, që përfshin mbështetjen ndaj komuniteteve lokale, në përgjigje ndaj fatkeqësive natyrore, përmes operacioneve të kërkim-shpëtimit”.

Në anën tjetër, Lëvizja Vetëvendosje i ka bërë jehonë shkuarjes së FSK-së në veri të vendit për një angazhim të saj për të gjetur një trup të pajetë të një 33-vjeçari, i cili dyshohet se është mbytur të dielën pasdite në Liqenin e Ujmanit, në Zubin Potok.

Sipas partisë të parë në vend FSK, ka shkuar për herë të parë në veri të vendit, nën shoqërimin e KFOR-it për të ndihmuar në gjetjen e trupit të pajetë.

Që nga e diela, personi i cili është raportuar se është hedhur nga ura, po kërkohet nga ekipet e Policisë së Kosovës, ato të kërkim-shpëtimit si dhe njësitet zhytëse.

Deri më tani nuk ka rezultuar në gjetje të asnjë gjurme të tij./Lajmi.net/