Klubi i njohur i Zvicrës, Basel, ka njoftuar me anë të një njoftimi se ka emëruar kapitenët e rinj të klubit të tyre.

Në këtë listë, kapiten është i skuadrës është bërë Xherdan Shaqiri derisa zëvendësues i tij është futbollisti i Kombëtares Shqiptare, Taulant Xhaka.

Kapiten i tretë i Baselit është Dominik Schmid.

Kujtojmë se mesfushori kosovaro-zviceran, Xherdan Shaqiri është rikthyer në Basel, 12 vjet pasi u largua nga klubi ku filloi karrierën e tij.

Basel e njoftoi transferimin me një deklaratë të titulluar “Mirësevjen në shtëpi, Shaq,” duke bërë të ditur se Shaqiri ka nënshkruar një kontratë trevjeçare. Klubi zviceran publikoi gjithashtu një video në rrjetet sociale për të shënuar këtë rikthim.

“Jam i mbushur me krenari dhe shumë i lumtur që mund të kthehem sot në qytetin tim të lindjes, te FCB,” tha Shaqiri. “Kam pasur një lidhje të thellë me klubin dhe rajonin që kur isha fëmijë, si tifoz dhe sigurisht si lojtar.

“Unë e përfundova formimin tim futbollistik në Basel dhe më pas munda të nisja karrierën time ndërkombëtare. Tani dua të shënoj gola përsëri me FCB dhe mezi pres të takoj përsëri tifozët tanë.”

Shaqiri u rrit në radhët e të rinjve të Baselit pasi iu bashkua akademisë së klubit në moshën tetëvjeçare. Ai luajti tre vite me ekipin e parë – duke fituar titullin e ligës zvicerane në secilin prej këtyre sezoneve – përpara se të transferohej te Bayern Munich në vitin 2012.

Ai gjithashtu ka luajtur për Inter Milan, Stoke City, Liverpool, Lyon dhe së fundmi për Chicago Fire. Kontrata e tij me klubin amerikan u ndërpre me marrëveshje të ndërsjellë në verën e vitit të kaluar.

Shaqiri ka fituar Ligën e Kampionëve me Bayern dhe Liverpool, si dhe tituj kampion në Gjermani dhe Angli.