Reshjet e dendura të shiut kanë shkaktuar vërshime të konsiderueshme në komunën e Drenasit, duke përmbytur zona të tëra dhe dhjetëra automjete. Siç shihet edhe në pamjet e siguruara nga terreni, një parking i mbushur me vetura është mbuluar pothuajse plotësisht nga uji, duke shkaktuar dëme të mëdha materiale.

Uji ka depërtuar me shpejtësi, duke bllokuar automjetet dhe duke e bërë të pamundur qarkullimin në këtë zonë. Banorët shprehen të shqetësuar për situatën, ndërsa theksojnë se vërshime të tilla po përsëriten sa herë që ka reshje intensive.

Deri më tani nuk raportohet për të lënduar, por dëmet materiale janë të konsiderueshme. Autoritetet lokale pritet të dalin me një vlerësim zyrtar të situatës, ndërkohë që ekipet përgjegjëse janë në terren për të monitoruar gjendjen dhe për të parandaluar rreziqe të tjera.

Institucionet u bëjnë thirrje qytetarëve të shmangin zonat e rrezikuara dhe të tregojnë kujdes të shtuar deri në stabilizimin e situatës. /Lajmi.net/