Donald Trump dha detaje për disa nga urdhrat e parë të tij ekzekutivë që planifikon t’i ndërmarrë si president i SHBA-së, pasi u betua.

Sot, ai tha se do ta nënshkruajë një urdhër ekzekutiv që shpall një emergjencë kombëtare në kufirin SHBA-Meksikë.

Të gjitha hyrjet e paligjshme do të “ndalohen menjëherë”, tha ai, duke shtuar se qeveria do të fillojë procesin e kthimit të miliona “të huajve kriminelë” nga kanë ardhur.

Trump tha se do të ndryshojë sot emrin e Gjirit të Meksikës në “Gjiri i Amerikës”, teksa nënvizoi disa veprime që do t’i ndërmarrë menjëherë.

“Amerika do ta rimarrë vendin që i takon si kombi më i madh, më i fuqishëm, më i respektuar në Tokë – duke frymëzuar frikën dhe admirimin e të gjithë botës”, tha Trump. “Në një kohë të shkurtër nga tani, ne do ta ndryshojmë emrin e Gjirit të Meksikës në Gjirin e Amerikës”.

Ai tha se Panamaja i ka shkelur marrëveshjet e traktateve që kërkojnë neutralitet në operacionet e kanalit.

“Anijet amerikane po ngarkohen rëndë dhe nuk trajtohen në mënyrë të drejtë në asnjë mënyrë, dhe kjo përfshin Marinën e Shteteve të Bashkuara”, pohoi Trump. “Dhe mbi të gjitha, Kina po operon Kanalin e Panamasë dhe ne nuk ia dhamë atë Kinës. Ne ia dhamë Panamasë. Dhe ne po e marrim atë”, tha Trump.