Presidenti i Shteteve të Bashkuara, Donald Trump, ka njoftuar të mërkurën se SHBA-ja do të vendosë një tarifë bazë prej 10% për të gjitha importet nga vendet e botës, përfshirë këtu edhe Kosovën dhe shtetet e tjera të Ballkanit Perëndimor.

Ky vendim pritet të ketë pasoja të mëdha për eksportet kosovare, duke pasur parasysh që vitet e fundit ka pasur një rënie të ndjeshme të tregtisë mes dy vendeve.

Dhoma e Tregtisë dhe Industrisë e Kosovës ka shprehur shqetësimin e saj lidhur me vendimin e presidentit Trump, ku thuhet se ky vendim pritet të dëmtojë edhe më shumë sektorin e eksportit, i cili tashmë ka pësuar një ulje të dukshme.

Dhoma e Tregtisë ka theksuar se ky është një problem që ka qenë parashikuar prej kohësh, duke kërkuar nga institucionet e Kosovës që të përdorin kanalet diplomatike për të parandaluar këtë vendim.

Ata kanë apeluar që Qeveria e Kosovës të ndërmarrë masa të shpejta për të mbrojtur interesat e biznesve kosovare, të cilat mund të përballen me vështirësi të mëdha në rast se ky vendim mbetet në fuqi.

Gjithashtu, Dhoma e Tregtisë dhe Industrisë ka kërkuar që Qeveria e Kosovës të ofrojë mbështetje për bizneset që do të preken nga kjo tarifë e re, duke u siguruar që ato të kenë mundësi të adaptohen dhe të minimizojnë ndikimet negative të kësaj situate.

“Taksa e SHBA-ve ndaj Kosovës, do ta rëndoj edhe më shumë ekonominë tonë. Dhoma e Tregtisë dhe Industrisë Kosovë, ka pritur me shqetësim vendimin e presidentit amerikan Donald Trump që t’i vendos eksporteve nga Kosova taksën prej 10%. DhTIK, ka kohë që ka alarmuar për një vendim të tillë dhe ka kërkuar nga institucionet që të shfrytëzojnë kanalet diplomatike për të mos ndodhur ky vendim.

Gjithashtu, DhTIK i bënë thirrje qeverisë që t’u dalë në ndihmë bizneseve që atakohen nga ky vendim sepse nga ky hap do të rrezikohen qindra vende të punës. Vendimi i marr nga administrata Trump, pritet ta godas edhe më shumë eksportin, i cili nga Kosova drejtë SHBA-ve ka pasur ulje përgjatë muajve të fundit.

Sipas të dhënave të Agjencisë së Statistikave të Kosovës, në dhjetor 2024, eksportet tona ishin 3.5%, përderisa në muajin janar dhe shkurt 2025, ato ranë në 2.8, përkatësisht 2.5% në muajin shkurt të këtij viti“, thuhet në reagim.

Kujtojmë se Trump vendosi dje tarifa bazë prej 10 për qind ndaj të gjitha vendeve që shesin mallra në SHBA, përfshirë këtu edhe Kosovën e Shqipërinë, e për disa tjera, me të cilat vendi i tij ka deficit ekonomik e tregtar, taksat i ngriti deri në 34 për qind, si në rastin e Kinës, 20 për BE-në e 24 për Japoninë.

Presidenti tha se e mori këtë vendim pasi vendet dhe ekonomitë tjera përfituan shumë nga shtetet e bashkuara, të cilën, sic deklaroi, e shkatërruan shumë.

Sa i përket tarifave doganore që ShBA vendosi për vendet e Ballkanit, del që Serbia të jetë më e prekura me një tarifë prej 37%, që pason me Bosnjën dhe Maqedoninë e Veriut që janë me 35%.

Tarifat doganore për vendet e Ballkanit:

Kosova: 10%
Shqipëria: 10%
Maqedonia e Veriut: 35%
Bosnja dhe Hercegovina: 35%
Serbia: 37%.

Trump tha se tarifat që po i vendos janë reciproke, të cilat i shpjegoi me fjalinë e thjeshtësuar “ata na bëjnë neve, ne ua bëjmë atyre”./Lajmi.net/