Tri shkresa pa përgjigje: Sindikata e Re e KEK-ut akuzon Hekuran Muratin për heshtje ndaj kërkesës për pagën e 13-të

Lajme

17/03/2026 19:05

Sindikata e Re e KEK-ut ka reaguar publikisht pasi, sipas saj, nuk ka marrë përgjigje nga Hekuran Murati, ministër i Ministria e Financave, Punës dhe Transfereve, lidhur me kërkesën për pagën e 13-të për punëtorët e Korporata Energjetike e Kosovës (KEK).

Në reagimin e saj, sindikata thotë se i ka dërguar tri shkresa zyrtare ministrit Murati, por nuk ka marrë asnjë përgjigje, duke e cilësuar këtë si heshtje institucionale dhe shpërfillje ndaj punëtorëve të sektorit energjetik, transmeton lajmi.net.

Sipas tyre, vendimet e fundit të Ministrisë së Financave kanë krijuar ndjenjë diskriminimi te punëtorët e KEK-ut, të cilët, siç thuhet në reagim, për dekada kanë qenë shtylla kryesore e furnizimit me energji dhe stabilitetit ekonomik të vendit.

Sindikata ka shprehur gjithashtu shqetësim për trajtimin e veteranëve që vazhdojnë të punojnë në KEK, duke theksuar se disa prej tyre përballen me ndërprerjen e pensionit për kontributin e tyre në Ushtria Çlirimtare e Kosovës.

“Punëtorët e KEK-ut nuk kërkojnë privilegje — kërkojnë drejtësi, dinjitet dhe respekt për djersën e tyre. Injorimi i vazhdueshëm i këtyre kërkesave legjitime nuk është vetëm padrejtësi sociale, por edhe goditje ndaj vetë themelit të shtetit”, thuhet në reagim.

Në fund të reagimit, Sindikata e Re e KEK-ut paralajmëron se, nëse kërkesat e tyre vazhdojnë të injorohen, do të ndërmarrin hapa të tjerë sindikalë dhe qytetarë për të mbrojtur të drejtat e punëtorëve.

Komunikata e plotë:

REAGIM PUBLIK

Pas tri shkresave zyrtare të dërguara ndaj ministrit Hekuran Murati lidhur me pagën e 13-të, dhe përballë mungesës totale të përgjigjes, jemi të detyruar të dalim me reagim publik.

Heshtja institucionale ndaj një kërkese të drejtë është e papranueshme dhe dëshmon shpërfillje ndaj punëtorëve të Korporatës Energjetike të Kosovës, të cilët për dekada kanë qenë shtylla kryesore e furnizimit me energji dhe stabilitetit ekonomik të vendit.

Vendimet e fundit të Ministrisë së Financave po krijojnë një ndjenjë të thellë diskriminimi. Është e pakuptimtë dhe e padrejtë që pikërisht ata që mbajnë gjallë sistemin energjetik të Kosovës të përballen me mohimin e të drejtave të tyre elementare, përfshirë pagën e 13-të dhe trajtimin e padrejtë të veteranëve që vazhdojnë të kontribuojnë në punë, të cilëve u është ndalur pensioni për kontributin e tyre në luftën e Ushtris Çlirimtare të Kosovës.

Punëtorët e KEK-ut nuk kërkojnë privilegje — kërkojnë drejtësi, dinjitet dhe respekt për djersën e tyre. Injorimi i vazhdueshëm i këtyre kërkesave legjitime nuk është vetëm padrejtësi sociale, por edhe goditje ndaj vetë themelit të shtetit.

Shteti nuk ndërtohet mbi heshtje dhe diskriminim, por mbi punë, sakrificë dhe drejtësi.

Nëse kjo padrejtësi vazhdon, do të detyrohemi të ndërmarrim hapa të tjerë sindikalë dhe qytetarë për të mbrojtur të drejtat tona.

Me respekt,

Sindikata e Re e KEK-ut./lajmi.net/