Nëse do ta udhëheqë edhe për një mandat Komunën e Prishtinës, Isa Mustafa premtoi investime më të mëdha në kulturë.

Përveç projekteve të realizuara, Mustafa ka shpalosur programin për kulturën në  mandatin e ardhshëm.

Në një koktej të organizuar nga LDK, në praninë e shumë figurave të rëndësishme të muzikës, artit, teatrit  Mustafa ka thënë sot se do t`i japë më shumë hapësirë kulturës pasi që tani kanë përfunduar projektet të cilat ai i quajti emergjente.

“Ne do të rrisim investimet për kulturë në periudhën e ardhshme kohore sepse kemi përfunduar pothuajse gati të gjitha investimet emergjente të cilat i kemi pasur gjatë kësaj periudhe, shkollat rrugët qendrat e mjekësisë familjare”.

“Tani na ka mbetur më shumë të punojmë hapësirat e gjelbra, në objekte sportive për të rinj të punojmë në objekte kulturore”.

Mustafa u premtoi aktorëve të Teatrit Dodona se do t`ua ndërtojë edhe një teatër. Plani i tij nuk mbaron këtu, pasi kryetari aktual ka në plan ndërtimin e “Muzeut të Eksodit”.

“Do ta ndërtojmë teatrin e qytetit që i kemi premtuar teatrit Dodona për arsye se ky teatër ka dhënë më së shumti shfaqje nga të gjitha teatrot e Kosovës”.

“Kemi premtuar se do ta ndërtojmë Muzeun Eksodit. Ideja është që të bëjmë një muze në të cilin ne do të ekspozojmë të gjitha fotografitë që shënojnë periudhën e viteve ‘99, kur është bërë eksodi i madh i popullatës shqiptare nga Kosova”.

Sipas tij, investimet do të vazhdojnë edhe në restaurimin e objekteve tjera kulturore e fetare me qëllim të ruajtjes së trashëgimisë kulturore.