Policia Rajonale e Ferizajt ka ndërhyrë sot pasdite në një dasmë në fshatin Greme, pas raportimeve për të shtëna me armë zjarri.

Rasti është regjistruar rreth orës 13:00, kur njësitë përkatëse të policisë – përfshirë njësinë e rendit, hetuesit dhe forenzikën – kanë dalë menjëherë në vendin e ngjarjes, transmeton lajmi.net

Sipas njoftimit zyrtar, gjatë kontrollit të ushtruar në oborrin e shtëpisë së të dyshuarit S.A. (57 vjeç), janë gjetur dhe sekuestruar 50 gëzhoja armësh zjarri.

I dyshuari ka prezantuar para autoriteteve dy armë zjarri: një revole dhe një pushkë gjuetie, të cilat janë sekuestruar me urdhër të prokurorit të shtetit, së bashku me gëzhojat e gjetura në vendin e ngjarjes.

Ndaj personit në fjalë është iniciuar hetim për dy vepra penale:

• “Mbajtja në pronësi, kontroll ose posedim të paautorizuar të armës”

• “Përdorimi i armës apo mjetit të rrezikshëm”

Pas përfundimit të procedurave të para hetimore dhe intervistimit nga ana e policisë, i dyshuari është liruar në procedurë të rregullt, ndërkohë që hetimet po vazhdojnë./lajmi.net/