Të paktën dy persona humbën jetën ndërsa zjarret shpërthyen në Portugalinë qendrore dhe veriore të hënën, duke detyruar autoritetet të evakuojnë fshatrat, të mbyllin autostradat dhe t’i kërkojnë Bashkimit Evropian të dërgojë më shumë avionë me ujë.

Situata ishte më e rrezikshme në distriktin veriperëndimor Aveiro, ku zjarri arriti në periferi të qytetit Albergaria-a-Velha dhe dogji disa shtëpi, tha kryebashkiaku.

Më shumë se 1,100 zjarrfikës po luftonin me atë zjarr dhe tre të tjerë në zonën përreth. Policia mbylli një pjesë të autostradës kryesore midis Lisbonës dhe Portos pasi tymi i dendur mbuloi zonën.

Policia tha se oficerët kishin gjetur eshtrat e një burri që me sa duket kishte punuar për një kompani pyjore aty pranë.

Në të njëjtën zonë, një person tjetër vdiq nga një atak në zemër me afrimin e zjarrit dhe dy persona ndodheshin në spital me lëndime të rënda, sipas shërbimit të mbrojtjes civile.

Autoritetet thanë se kishin vendosur 12 avionë bombardues me ujë në atë distrikt dhe po shuanin të paktën 20 zjarre në të gjithë vendin, shkruan Reuters.