Sot është Dita Ndërkombëtare e Personave të Zhdukur. Kur janë bërë 26 vjet nga përfundimi i luftës në Kosovë, zyrtarisht edhe mbi 1590 persona figurojnë si të zhdukur.

Kjo ditë është shënuar dje dhe do të vazhdojë edhe sot me aktivitete të ndryshme.

Fondi për të Drejtën Humanitare sonte në orën 18:00, do të inaugurojë memorialin “Pema e Jetëve”.

Kurse, Nisma e të Rinjve për të Drejtat e Njeriut – Kosova (YIHR KS) duke filluar nga ora 20:00, shënon këtë ditë me një aksion rrugor, ku do të lexohen/dëgjohen 1590 emrat e personave të zhdukur nga lufta e fundit në Kosovë.

Pas përfundimit të luftës në Kosovë, në vitin 1999, të zhdukur kanë qenë rreth 6.500 persona. Që nga ajo kohë janë kryer disa zhvarrime në varreza masive në Kosovë dhe Serbi, dhe deri më tash janë gjetur rreth 70 për qind e të zhdukurve.