Një video që ka bërë xhiron e rrjeteve sociale ka tronditur dhe prekur zemrat e shqiptarëve anembanë botës.

Në këtë video, pretendohet se këngëtarja e njohur shqiptare, Parashqevi Simaku, shfaqet duke marrë ndihma për Krishtlindje në New York, për shkak të një situate të vështirë ekonomike.

Lajmi ka shkaktuar një reagim të gjerë dhe emocionues, duke bërë që shumë bashkatdhetarë të shprehin keqardhjen e tyre dhe të kërkojnë zgjidhje të menjëhershme për t’i ardhur asaj në ndihmë.

Në mesin e reagimeve, bie në sy një iniciativë e fuqishme dhe plot emocion e artistes së madhe shqiptare, Shkurte Fejza.

Me dekada në skenë dhe një figurë simbol e muzikës popullore dhe patriotike shqiptare, Shkurte Fejza ka ndarë në rrjetet sociale një video të një prej interpretimeve më të spikatura të Parashqevi Simakut në Festivalin e Këngës, duke shoqëruar postimin me një mesazh prekë.

“Kështu e kujtoj Parashqevi Simakun dhe dua ta shoh të lumtur dhe të kthyer në jetë”, shkruan Shkurte Fejza.

“Të bëjmë diçka për të, nëse është e vërtetë ajo që shkruhet në media. Ta organizojmë një koncert të madh dedikuar Parashqevi Simakut”, vazhdoi më tutje ajo.

Mesazhi i Shkurte Fejzës ka ngjallur një valë mbështetjeje nga artistë dhe admirues të shumtë të muzikës shqiptare. Propozimi i saj për një koncert madhështor për të nderuar dhe ndihmuar Simakun është konsideruar një ide e shkëlqyer, që mund të shërbejë jo vetëm si një ndihmë e drejtpërdrejtë për këngëtaren, por edhe si një akt i fuqishëm solidariteti kombëtar.

Parashqevi Simaku, dikur një nga emrat më të dashur të muzikës shqiptare, është bërë pjesë e pandarë e kujtimeve të artit shqiptar me këngët dhe performancat e saj që kanë lënë gjurmë të thella në kulturën muzikore.