Gjykata Supreme dje ka shfuqizuar Udhëzimi Administrativ për Shfrytëzimin e Pajisjeve Elektronike Fiskale, Sistemeve Fiskale dhe Softuerëve Elektronikë Fiskalë.

Këtë vendim, Gjykata Supreme e ka marrë pasi që sipas tyre Qeveria në detyrë ka të drejtë të kryejë vetëm aktivitetet e domosdoshme dhe të planifikuara në Planin vjetor të punës së Qeverisë dhe në ligjin vjetor për buxhetin, duke përjashtuar miratimin e akteve nënligjore normative të reja.

Kësisoj sipas vendimit i bie se ministri në detyrë, Hekuran Murati nuk kishte të drejtë nënshkrimin e këtij udhëzimi – apo do të mund ta nënshkruante sa ishte në qeverisje pa përfunduar mandati, por si për çudi e la për në fund.

Vendimi për udhëzimin administrativ të arkave fiskale që bëri telashe të mëdha tek bizneset, ra poshtë pas vendimit të Supremes.

Në lidhje me këtë vendim të Gjykatës Supreme, ka reaguar vetë ministri në detyrë i Financave, Punës dhe Transferefe, Hekuran Murati i cili këtë vendim e ka quajtur “absurd” dhe i cili përmendi me emra gjykatësit që morën vendimin.

Murati duke ua përmendur emrat gjyqtarëve të Supremes që kanë marrë këtë vendim, ka thënë se i njëjti është vendim absurd dhe se nënkupton ndërprerje të procesit të digjitalizimit..

Ai ka thënë se ky vendim absurd i Gjykatës Supreme nënkupton ndërprerje të procesit të digjitalizimit, dhe vazhdim të zhvatjes së bizneseve përmes kostove enorme për arkat e vjetra fiskale.

Ehat Miftaraj nga IKD ka thënë se Gjykata Supreme e ka vlerësuar se Udhëzimi Administrativ është i paligjshëm dhe ka vendosur për shfuqizimin e tij, sepse Ministri i Financave nuk ka pasur mandat të vlefshëm në atë kohë.

Miftaraj ka thënë se sipas Gjykatës, Ministri i Financave ka qenë në pozitë të papajtueshme funksionale në kohën e nënshkrimit, duke qenë i certifikuar si deputet në shkelje të Kushtetutës, e cila ndalon ushtrimin paralel të funksioneve ekzekutive dhe legjislative, si dhe parimin e ndarjes dhe kontrollit të pushteteve të përcaktuar në Kushtetutë.

“Kësisoj me të drejtë Gjykata ka vendosur se nxjerrja e Udhëzimit Administrativ nga një person që ushtron njëkohësisht detyrën e deputetit dhe të ministrit është e kundërligjshme dhe shkel dispozitat kushtetuese. Vendimi i Supremes, krijon standard të rëndësishëm për respektimin e parimit të ndarjes së pushteteve dhe të sigurisë juridike. Për praktikën institucionale, ky aktgjykim është një precedent, sepse konfirmon se çdo akt i miratuar në kundërshtim me autorizimet ligjore do të shpallet i pavlefshëm. Pas këtij rasti, pritet që çdo vendim i ngjashëm të sfidohet dhe të anulohet në gjykatë”, ka thënë Miftaraj për lajmi.net.

Vendimin e marrë nga Gjykata Supreme e ka vlerësuar si të drejtë edhe avokati i njohur kosovar, Ardian Bajraktari.

Ai ka thënë se tash e një kohë ka deklaruar se është e ndaluar të ushtrohet funksioni i deputetit bashkë me funksionin si anëtar i Qeverisë, e të cilën ka thënë se e ka konfirmuar tani më edhe Gjykata.

“Shpresoj me pas reflektim, në drejtim të kuptuarit të qartë të kësaj situate dhe me reflektu, veçmas subjekti më i madh politik me ndërmarrë hapa konkret në drejtim të themelimit të institucioneve. Sulmet dhe etiketimet në adresë të sistemit të drejtësisë janë ta papranueshme, të njëjtat duhet të ndalen, e minojnë tej mase besimin e publikut në drejtësi. Vendimet e gjykata duhet të zbatohet”, ka thënë Bajraktari për lajmi.net.

Fjalorit të përdorur nga Qeveria e Kosovës, i ka reaguar sot edhe vetë Gjykata Supreme përmes një komunikate zyrtare të lëshuar për media.

Këtë reagim të Qeverisë së Kosovës, Supremja e ka quajtur si “tendencioz”.

“Reagimi i Qeverisë në detyrë, përbën, jo vetëm një keqinterpretim të natyrës së vendimmarrjes gjyqësore, por njëkohësisht një ndërhyrje të papranueshme në pavarësinë e gjyqësorit. Të gjitha institucionet, përfshirë Qeverinë, janë të obliguara ta respektojnë pavarësinë e gjyqësorit si një nga themelet e rendit kushtetues të Republikës së Kosovës. Vendimet e Gjykatës Supreme janë të bazuara në Kushtetutë dhe në ligjet në fuqi të Republikës së Kosovës dhe si të tilla duhet të respektohen”, thuhet në reagimin e Gjykatës.