Administrata amerikane ka vendosur masa të reja në politikat e emigracionit, duke ndryshuar procedurat për personat që kërkojnë qëndrim të përhershëm në Shtetet e Bashkuara.

Sipas udhëzimeve të publikuara nga Shërbimi i Shtetësisë dhe Emigracionit i SHBA-së (USCIS), të huajt që ndodhen përkohësisht në territorin amerikan dhe synojnë të pajisen me “green card” nuk do të mund ta përfundojnë procesin brenda SHBA-së, por do të detyrohen të rikthehen në vendet e tyre për të aplikuar përmes përfaqësive diplomatike amerikane, transmeton lajmi.net.

Vendimi është bërë publik përmes një memorandumi të ri politikash, ku kërkohet që secili rast të shqyrtohet individualisht për të vlerësuar nëse ekzistojnë rrethana të jashtëzakonshme që mund të justifikojnë përjashtime.

Departamenti Amerikan i Sigurisë Kombëtare deklaroi se politika e re synon të rikthejë funksionimin e sistemit sipas ligjit dhe të shmangë, sipas tyre, përdorimin e boshllëqeve ligjore në procesin e emigracionit.

Autoritetet amerikane thonë gjithashtu se ndryshimi do të ndihmojë në lirimin e kapaciteteve të USCIS-it për trajtimin më të shpejtë të rasteve të tjera.

Megjithatë, organizatat humanitare kanë reaguar kundër këtij vendimi. Organizata HIAS paralajmëroi se masa mund të prekë rëndë viktimat e trafikimit njerëzor, si dhe fëmijët e abuzuar apo të neglizhuar, të cilët mund të detyrohen të kthehen në vende të pasigurta vetëm për të vazhduar procedurat për marrjen e lejes së qëndrimit të përhershëm.

Kjo konsiderohet si pjesë e politikave më të ashpra të emigracionit të administratës së presidentit Donald Trump. Gjatë muajve të fundit, administrata amerikane ka ndërmarrë disa masa kufizuese, përfshirë shkurtimin e afateve të vizave për studentët, programet e shkëmbimit kulturor dhe përfaqësuesit e mediave.

Po ashtu, Departamenti Amerikan i Shtetit kishte njoftuar më herët se mbi 100 mijë viza janë revokuar që nga rikthimi i Trumpit në Shtëpinë e Bardhë./lajmi.net/