Mark Samson, 23-vjeçari filipinas, ka pranuar para hetuesve se ka vrarë ish-të dashurën e tij, 22-vjeçaren shqiptare Ilaria Sula, duke deklaruar se nuk mund të pranonte ndarjen.

Ai e ka qëlluar atë në banesën e tij në Romë, përpara se të tentonte të fshihte gjurmët e krimit.

Pas vrasjes, Samson e futi trupin e viktimës në një valixhe dhe e transportoi me makinë drejt një zone të pyllëzuar në Poli, afër Romës, ku e hodhi në një humnerë. Ai pranoi gjithashtu se hodhi telefonin e Sulës në një pusetë për të shmangur gjurmimin.

“Trupin e futa në makinën time, e vendosa në një valixhe dhe e çova në Poli,” ka rrëfyer ai para hetuesve.

Ilaria Sula ishte raportuar e zhdukur më 25 mars, ndërsa pas disa ditësh kërkime, trupi i saj u gjet mëngjesin e së mërkurës në një zonë pyjore, rreth 40 kilometra larg Romës.

Gjatë hetimeve, autoritetet zbuluan se Samson kishte përdorur telefonin e viktimës për të postuar mesazhe dhe për të krijuar përshtypjen se ajo ishte ende gjallë.