Kryetari i Komunës së Prishtinës, Shpend Ahmeti është shprehur i bindur se rrethrrotullimi që lidh Veternikun me qendrën e qytetit do të jetë në funksion në muajin maj.

Ahmeti këto deklarata i bëri sot gjatë prezantimit të raportit për të gjeturat në Drejtorinë e Infrastrukturës.

Ai tha se tashmë janë përmbyllur të gjitha procedurat dhe pas konsultimeve me Ministrinë e Mjedisit dhe Planifkimit Hapësinor, do të vazhdojë me planin për rrënimin e pompës së benzinës “Kosova Petrol”.

“Rrethrrotullimi në Veternik është çështje e kryer, tashmë janë përfunduar të gjitha procedurat. Unë kam kërkuar planin e rrënimit nga kompania “Beni Com” e cila është përgjegjëse”.

“Në momentin që e marrë planin e rrënimit sepse kemi të bëjmë me pompë të benzinës, e cila ka edhe efekte mjedisore në konsultim më Ministrinë e Mjedisit dhe Planifikimit Hapësinor, vazhdojmë me planin e rrënimit”.

“Besoj dhe shpresoj që kjo në fillim të javës së ardhshme ndoshta edhe nga fundi i kësaj jave përfundon dhe Hyseni si drejtor i Infrastrukturës është në diskutime me kompaninë për orarin dhe planin e punës”.

“ Unë jam shumë i bindur se në muajin maj do ta kemi rrethrrotullimin në funksion dhe nuk do të ketë më  pengesa dhe ndalesa”, tha Ahmeti.