Avokatja Majlinda Sadikaj ka bërë të ditur se klientit të saj, Bashkim Shaqiri, zyrtar në Agjencinë Kadastrale të Kosovës, nuk i është caktuar masa e paraburgimit pas aksionit të zhvilluar nga Prokuroria dhe Policia e Kosovës.

Përmes një postimi publik, Sadikaj tha se Shaqiri do të mbrohet në procedurë të rregullt dhe se mbetet e bindur në pafajësinë e tij, transmeton lajmi.net.

“Bashkim Shaqirit, zyrtar në Agjencionin Kadastral të Kosovës i ndaluar dje nga prokuroria, të cilin e përfaqësoj, nuk i është caktuar masa e paraburgimit nga gjykata dhe do të vazhdojë në procedurë të rregullt”, ka shkruar ajo.

Avokatja shtoi se pret që pafajësia e klientit të saj të dëshmohet gjatë procesit gjyqësor.

“Besimi ynë në pafajësinë e tij është i palëkundur dhe presim që kjo të vërtetohet në këtë procedurë”, deklaroi Sadikaj.

Ajo theksoi gjithashtu se trajtimi i zyrtarëve shtetërorë duhet të bëhet me integritet dhe me respektim të sigurisë juridike.

“Trajtimi i zyrtarëve të shtetit duhet të bëhet me integritet dhe me ruajtjen e sigurisë juridike, në mënyrë që të garantohet ushtrimi i autorizimeve të pozitës zyrtare pa frikë dhe presion”, u shpreh ajo.

Ndryshe, Gjykata Themelore në Prizren ka refuzuar kërkesën e Prokurorisë për caktimin e paraburgimit ndaj pesë personave të ndaluar në aksionin e realizuar në Agjencinë Kadastrale të Kosovës dhe në disa lokacione të tjera, duke u caktuar atyre masën e paraqitjes në stacion policor.

Aksioni u zhvillua nga Prokuroria Themelore në Prishtinë, në bashkëpunim me Policinë e Kosovës, në kuadër të hetimeve për veprat penale “Keqpërdorimi i detyrës zyrtare apo autoritetit zyrtar” dhe “Falsifikimi i dokumenteve”./lajmi.net/