Qytetarët e quajnë të padrejtë propozim-aktakuzën ndaj Thaçit e Veselit

“Heronj të luftës dhe paqes”, kështu shkruan në pllakatin e vendosur te hotel “Grandi”, në sheshin e kryeqytetit në mbështetje të luftës së lavdishme të Ushtrisë Çlirimtare të Kosovës, presidentit Hashim Thaçi dhe kreut të PDK-së, Kadri Veseli.

Lajme

05/07/2020 18:01

Muajin e kaluar Gjykata Speciale në Hagë doli me propozim-aktakuzë ndaj Thaçit, Veselit dhe nëntë të tjerëve nga Kosova për kinse krime lufte.

Derisa Thaçi dhe Veseli kanë mohuar pretendimet në propozim-aktakuzë për kinse krime lufte dhe thanë se ligjin e vetëm që ka shkelur është ai i kasapit të Ballkanit Sllobodan Millosheviq, qytetarët thonë se është bërë gabim kur është votuar kjo gjykatë nga Kuvendi i Kosovës.

Bejtullah Hajdari nga Prishtina tha për KosovaPress se propozim-aktakuza ndaj Thaçit dhe Veselit janë të padrejta dhe për këtë ai si qytetar iu bën thirrje partive politike që të bëhen bashkë dhe të punojnë për të njëjtin qëllim.

“Është shumë gjendje e rëndë dhe janë akuza të padrejta, sepse janë themelues të lirisë të sotme, që e gëzojnë edhe gjeneratat pas nesh… Kosova duhet të mobilizohet për t’i lënë ndarjet partiake, dhe të gjithë të punojnë për të njëjtin qëllim. Ose të shfuqizohet gjykata ose të tregohet e vërteta se këta vërtetë janë çlirimtarët e Kosovës dhe jo kriminelë”, tha ai.

Ndërsa, Qazim Berisha thotë se në rast se do të dënohen Thaçi e Veseli atëherë vendit tonë do t’i shkaktohet një dëm i madh i padrejtë, kur dihet se ka qenë Serbia ajo që ka kryer krime të tmerrshme lufte dhe për këtë nuk e ka marrë dënimin e merituar.

“Është katastrofë të dënohet një president vendi për neve. Do të thotë kryetari i Kosovës të dënohet për shqiptarizmin, e kjo është katastrofë për ne”, shprehet ai.

E dikush tjetër po kritikon vetë formimin e Gjykatës Speciale dhe për këtë Rizah Syla nga Prishtina uron që Thaçi e Veseli të dalin të pafajshëm.

“20 e kusur vjet, vetë e kanë lyp këtë gjykatë, askush me zor nuk i ka shti. Vetë e kemi thirrur, vetë e kemi votuar me qejf. A ka qenë ashtu?”, shprehet ai.

Edhe Zeka Jetullahu kujton krimet e bëra në Kosovë nga agresori serb, i cili deri më tash nuk ka kërkuar falje për gjithë ato vrasje që ka kryer ndaj popullsisë së pafajshme shqiptare.

“Ne kemi vuajtur prej serbëve prej që e kemi bërë këtë. Na kanë mbytur, na kanë djeg në zjarr, të gjitha na i kanë bërë”, tha ai.

Lajmi për propozim-aktakuzën ndaj Thaçit e Veselit, erdhi pak ditë para se të mbahej takimi Kosovë-Serbi më 27 qershor, në Shtëpinë e Bardhë. Kreu i shtetit u njoftua derisa po udhëtonte drejt Uashingtonit, derisa ky i fundit e kishte anuluar pjesëmarrjen e tij.

Gjykata Speciale për krime lufte është gjykatë e përkohshme me mandat të kufizuar dhe me seli në Hagë. Kjo gjykatë vepron e pavarur dhe financohet kryesisht nga BE. Ajo është themeluar me vendim të Kuvendit të Kosovës.