Zëdhënësi i Qeverisë së Kosovës, Përparim Kryeziu, ka reaguar pas raportimeve për përfshirjen e një shtetaseje serbe nga Mitrovica, me inicialet A.M., e arrestuar në Kroaci për dyshime për spiunazh për llogari të Serbisë.

Ai mohoi çdo pretendim për lidhje të saj me Zyrën e Kryeministrit të Kosovës, transmeton lajmi.net

“Në krye të herës duam ta bëjmë të qartë për publikun se Zyra e Kryeministrit përbëhet nga stafi civil i përhershëm dhe kabinetet e kryeministrit dhe zëvendëskryeministrave, të cilat përbëhen nga të emëruar politikë,” tha Kryeziu. Ai theksoi se qasja në informacione konfidenciale është “strikt e kufizuar” dhe nuk mund të ketë ndodhur asnjë rrjedhje nga brenda.

Zëdhënësi kujtoi se Serbia ka rritur aktivitetet e saj të inteligjencës në Kosovë pas humbjes së kontrollit në veri të vendit dhe përmendi disa raste të mëparshme të arrestimeve për spiunazh. “Viteve të fundit, Serbia ka rritur aktivitetet e spiunazhit… Ne vazhdimisht kemi ngritur në publik shqetësimet tona mbi aktivitetet e inteligjencës serbe në territorin e Republikës së Kosovës,” shtoi ai.

Në përfundim, Kryeziu tha se institucionet e sigurisë dhe inteligjencës së Kosovës janë të gatshme të bashkëpunojnë me autoritetet kroate për zbardhjen e plotë të rastit. “Institucionet tona janë në gatishmëri të plotë që të bashkëpunojnë me institucionet e Kroacisë për zhvillimin e mëtejmë të hetimeve dhe zbardhjen e plotë të aktiviteteve dhe rrjetit të veprimit,” përfundoi ai.

Postimi i plotë: