Projektligji për ndryshimin e Ligjit për Dhomat e Specializuara dhe Zyrën e Prokurorit të Specializuar është publikuar në faqen e Kuvendit të Kosovës.

Nisma, e cila tashmë është miratuar në lexim të parë, parasheh disa ndryshime thelbësore në funksionimin dhe juridiksionin e Speciales.

Ndryshimet e propozuara synojnë riformatimin e juridiksionit të Dhomave të Specializuara, duke e lidhur atë me pretendimet e përfshira në raportin e Asamblesë Parlamentare të Këshillit të Evropës të vitit 2011. Sipas projektligjit, periudha e juridiksionit do të përcaktohej nga 1 korriku 1999 deri më 31 dhjetor 2000, ndërsa kompetenca territoriale do të kufizohej në veprat e pretenduara të kryera në territorin e Kosovës.

Një tjetër ndryshim i propozuar është përcaktimi i 15 vjetëve si dënim maksimal me burgim.

Projektligji parasheh edhe bartjen te institucionet e Kosovës të rasteve që nuk do të përfshiheshin më në kompetencën e Speciales, si dhe mundësinë e ankesës në Gjykatën Supreme të Kosovës për çështje që lidhen me juridiksionin.

Po ashtu, parashihet që personat e dënuar të kenë mundësi t’i vuajnë dënimet në Kosovë, ndërsa në raste të caktuara të jetë e mundur edhe falja presidenciale.

Me hyrjen në fuqi të ndryshimeve, projektligji parasheh edhe rishqyrtimin e juridiksionit të rasteve.

Ndër ndryshimet kryesore që parashihen:

Ngushtimi i juridiksionit të Speciales, duke e lidhur atë me pretendimet specifike të raportit të Asamblesë Parlamentare të Këshillit të Evropës të vitit 2011;
Ndryshimi i periudhës kohore të juridiksionit, në 1 korrik 1999 – 31 dhjetor 2000;
Kufizimi i juridiksionit territorial në veprat e pretenduara të kryera në territorin e Kosovës;
Kufizimi i dënimit maksimal me burgim në 15 vjet;
Transferimi tek institucionet e Kosovës i rasteve që, sipas juridiksionit të ri, nuk do të ishin më kompetencë e Dhomave të Specializuara;
Mundësia e ankesës në Gjykatën Supreme të Kosovës për çështje që lidhen me juridiksionin;
Mundësia që të dënuarit t’i vuajnë dënimet në Kosovë;
Mundësia e faljes presidenciale për personat e dënuar me vendim të formës së prerë.
Projektligji parasheh gjithashtu rishqyrtimin e juridiksionit të rasteve pas hyrjes në fuqi të ndryshimeve.

“Neni 50 i Ligjit Nr. 05/L-053 ndryshohet si në vijim:  “Dënimi me burgim i shqiptuar nga Dhomat e Specializuara vuhet në institucionet korrektuese të Republikës së Kosovës, në pajtim me legjislacionin në fuqi të Republikës së Kosovës. Institucioni konkret korrektues caktohet nga autoriteti kompetent i Republikës së Kosovës, duke marrë parasysh kohëzgjatjen e dënimit, kushtet e sigurisë dhe rrethanat individuale të personit të dënuar.“

Kuvendi e miratoi projektligjin në lexim të parë me 91 vota për, pa asnjë votë kundër apo abstenim. LDK-ja nuk mori pjesë në votim.

Ende nuk është e qartë nëse projektligji do të kalojë në lexim të dytë gjatë ditës së sotme.

https://www.kuvendikosoves.org/shq/projektligjet/projektligji/?draftlaw=652

PLperndryshimineLigjitperDhomateSpecializuaradheZPS_q4zgvtXyDE