Studentët dhe të rinjtë e kanë nisur më herët protestën, që është në ditën e tretë të saj. Seanca e programuar për t’u mbajtur këtë të enjte në Kuvend u anulua, pasi ishte paralajmëruar rrethimi i godinës nga protestuesit.

Ndërkohë, një grup i madh të rinjsh është parë duke marshuar në Rrugën e Elbasanit, duke u bërë thirrje gjimnazistëve të Shkollës së Mesme të Gjuhëve të Huaja “Asim Vokshi”, si dhe studentëve të Fakultetit të Gjuhëve të Huaja dhe atij të Ekonomisë, që t’i bashkohen, A2.

Një grupim tjetër të rinjsh, marshuan para godinës së Parlamentit duke lëshuar thirrje si “Policia e Krimit”, por gjithçka deri tani duket e qetë dhe pa përplasje apo tensione.

Në të gjithë rrugët kryesore të qendrës së qytetit shihen pasojat e shkatërrimit të protestës së një nate më parë. Godinat e institucioneve kryesore shtetërore, disa të sulmuara një ditë më parë, janë rrethuar nga forca të shumta policore. Ndërsa punonjës të institucioneve private në Bulevardin “Dëshmorët e Kombit” janë parë duke hequr dosjet nga zyrat të cilave një natë më parë iu vu flaka.

https://www.youtube.com/watch?v=MPYNYa7pKCQ