Prokuroria Themelore në Prishtinë, e ka ftuar për intervistim në cilësinë e të pandehurit, veteranin e UÇK-së, Agim Pllashnikun për rastin e Fitore Pacollit.

Avokati i tij, Gent Gjini ka thënë për lajmi.net se ai është ftuar për intervistim më 31 tetor në ora 10:30.

Sipas Gjinit, ata kanë pritur që në cilësinë e të pandehurit do të ftohet deputetja Fitore Pacolli pasi sipas tij në video shihet se ajo e shtyn Pllashnikun dhe e nxit sigurimin e saj që ta sulmon atë.

“Ajo ka bërë edhe denoncim te rrejshëm me arsye se atë ditë Agim Pllashniku ka pasur në çantë mjet të rrezikshëm. Pra konsiderojmë se ne këtë rast ka interferim në drejtësi dhe është drejtësi subjektive ku në këtë rast deputetja Fitore Pacolli është dashur ta ketë cilësinë e palës së akuzuar andaj ne do kërkojmë që të përjashtimin e Prokurorisë së Prishtinës këtë çështje pasi që konsiderojmë se ka ndërhyrje politike në këtë çështje dhe amnestohen figurat politike të partisë se VV-së”, ka thënë Gjini për lajmi.net.

Lajmi.net ka dërguar pyetje edhe tek Prokuroria Themelore në Prishtinë, por deri në publikimin e këtij artikulli nuk kemi marrë përgjigje.

Agim Pllashniku derisa Pacolli po pinte kafe, e kishte quajtur “hajne” Pacollin për shkak të raportimeve se familjarët e saj kishin pranuar nga 100 mijë euro grante. Ai më pas ishte arrestuar nga Policia dhe është liruar. /Lajmi.net/