Presidenti amerikan Donald Trump nënshkroi faljet për aktivistët kundër abortit të enjten, gjatë një rundi tjetër të urdhrave ekzekutivë nga Zyra Ovale.

Trump fali 23 persona që ishin dënuar për bllokimin e qasjes në klinikat e abortit.

“Ata nuk duhet të ndiqen penalisht. Shumë prej tyre janë të moshuar. Ata nuk duhet të ndiqen penalisht”, tha ai.

Mediat amerikane raportojnë se një nga të falurit është Lauren Handy, drejtuese e grupit Progresiv Anti-Abortion Uprising (PAAU).

Grupi u dënua për komplot në vitin 2020 për të sulmuar një klinikë të shëndetit riprodhues në Uashington dhe për të bllokuar aksesin për të frikësuar pacientët dhe stafin.

Anëtarët u futën me forcë në Klinikën Surgi, duke plagosur një infermiere dhe kaluan disa orë brenda.

Handy u shpall fajtore në gusht 2023 dhe u dënua në maj 2024.

Të drejtat e abortit u bënë një çështje kyçe në garën presidenciale të 2024-ës pasi Gjykata e Lartë e SHBA-së përmbysi vendimin e 1973 Roe kundër Wade në 2022, duke i dhënë fund gati 50 viteve të mbrojtjes federale për abortin.